ANAA na sa 21,031 ang kinatibuk-ang mga kaso sa coronavirus disease (Covid-19) sa Cagayan de Oro, human nakatala ang syudad og 124 ka mga kaso sulod sa duha ka adlaw.
Sumala sa report sa City Health Office, sa 124 ka mga bag-ong lokal nga mga kaso, duha ang mga returning overseas Filipinos (ROFs) ug 122 ang mga local transmissions.
Matud ni medical officer Dr. Ted Yu, sa 122 ka mga bag-ong lokal nga kaso, 60 ang mga local index nga kaso, 14 ang mga close contacts sa mga pasyenteng nagpositibo sa coronavirus, 34 ang mga authorized persons outside residence (Apors), walo ang mga Apors with link, ug lima ang mga persons deprived of liberty (PDLs).
Nakatala ug usa ka patay ang dakbayan.
Ang ihap sa mga aktibo nga kaso sa Cagayan de Oro mitaas usab, aduna na karon sa 556.
Sa maong numero, 130 niini na-admit sa Northern Mindanao Medical Center ug uban pang mga ospital sa syudad, 406 ang mga outpatients, ug 20 ang mga ROFs/LSIs.
Nakatala usab og 14 ka mga Covid-positive nga mga kaso nga karon naka-recover. Anaa na karon sa 19,621 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 854.