ORMOC CITY - Nakuha na usab sa Department of Education (DepEd)-Tabango South District (TSD) ang ikaduhang grand champion title sa virtual employees night alang sa kapistahan ni Sr. Sto. Niño niadtong Dominggo, Enero 16.
Niadtong 2019 ug 2020, nag-champion na sila sa face to face presentation.
Pero tungod sa pandemya sa coronavirus disease 2019 (Covid-19), nagdesisyon ang fiesta executive committee nga virtual na ang paagi sa presentation sugod 2021.
Gusto sa komitiba nga mapadayon ang naandan nga aktibidad pero sa luwas lang nga paagi.
Niadtong 2021 virtual employees night, nakuha sa TSD ang grand slam title.
“Mas lisud gyod compare sa face to face. Sa wala pay Covid, pwede ra bisan asa mag practice then diritso na sayaw the day sa presentation. Unlike karon nga Covid, virtual gyod ang paagi, need gyod mi mangita og lain lain nga location and dapat maayo gyod ang mo- edit ug mo-video,” matod ni Rolando “Janjan” Manto Jr, choreographer ug director.
Nakaatbang karon sa TSD ang LGU-Tabango, Gibacungan National High School, Tabango Senior High, Pastor Salazar National High School, Marcelino Veloso National High School, Tabango National High School ug PIT-Tabango.
Gisayaw sa TSD ang mga musika sa 1970’s.
Kada grupo naay 15 ngadto sa 20 ka miyembro ug dili molapas og 5 minutos ang sayaw.
Gawas sa grand champion, nakuha sab sa TSD ang Best Overall Production, Best Female Performer ug Best Character sa float parade.
Nakuha sa PIT-Tabango ang 3rd place ug 2nd place ang Pastor Salazar.