Mga serbisyo sa National Bureau of Investigation in Central Visayas (NBI 7) gipaduol sa publiko sa pag-abli sa ilang unang Cebu district office sa Mandaue City sa Lunes, Enero 17, 2022.
Si NBI 7 Director Rennan Augustus Oliva niingon nga ang bag-ong district office nga nahimutang sa Mandaue City Sports Complex dili lang makapaduol sa clearance services niini, kon dili lakip na sa investigative ug ubang technical services sa bureau sa pagbatok sa kriminalidad ug kurapsyon.
Gawas niini, si Oliva nagkanayon nga ang presensya sa district office sa dakbayan makatabang pa sa pagpalambo ug pagpalig-on sa kalinaw ug kahapsay, ug paglambo sa ekonomiya sa lokalidad.
Dugang pa ni Oliva nga ang senior citizens ug persons with disability (PWD) mahimong maka-avail sa mobile services sa district office sa ilang tagsa-tagsa ka barangay.
Sa iyang bahin, si Arnel Pura, supervising agent sa Mandaue City District Office, niingon nga ang area of responsibility sa buhatan naglangkob sa dakbayan sa Lapu-Lapu, lungsod sa Cordova, Balamban, ug mga lungsod ug siyudad sa amihanang Sugbo.