Pagbisita sa mga piniriso sa Sawang Calero Police Station sa Cebu City Police Office (CCPO) gisuspenso human 15 ka mga piniriso ang nagpositibo sa coronavirus disease 2019 (Covid-19).
Matod ni Police Lieutenant Colonel Alan Rosario, hepe sa Police Community Relation sa CCPO, gipang-isolate na ang 15 ka binilango.
Kadtong mga bag-ong madakpan sa anti criminality operation ibutang una sila sa laing police station.
Gitug-an ni Rosario nga aduna nay gihimo ang mga pulis sa Sawang Calero Police Station aron dili kini makapanakod pa sa ubang mga pulis nga nag-duty sama sa pagbutang og ali nga plastik sa gawas sa detention cell.
Bisan pa niini, adunay tulo ka pulis ang nagpositibo sa Covid nga naka-isolate na sa ilang tagsatagsa ka mga panimalay sa pag-abag sa PNP Regional Health Service 7.
Gipahimangnoan na usab ang mga pulis sa matag police station nga matag panahon nga aduna silay madakpan, kinahanglan nga sundon lang ang health protocol ug sa panahon nga sila mamauli dili dayon mosulod sa itagsatagsa ka panimalay aron dili sila makatakod sa miyembro sa ilang pamilya.
Gipahibawo hinuon ni Rosario nga bakunado na ang tanang personnel sa CCPO apan wala sila mokompyansa ug nagsunod sa health protocols.
Samtang, si Cebu City Mayor Michael Rama nibisita sa mga selda sa police stations sa dakbayan.
“I did my visit yesterday (January 16) and been in three police stations and I am not happy to see the congestions in their detention cell,” matod ni Rama.
Gumikan niini, nanawagan siya ngadto sa Cebu Chamber of Commerce and Industry, Cebu Contractors Association ug sa shipping companies nga magpahuwam sa ilang container vans aron himuon nga temporaryo nga prisohan.
Matod pa ni Rama nga nagkinahanglan siya og labing minos 11 ka mga container vans aron dili na maghuot sa prisohan ang mga dinakpan.
Gihangop sa CCPO ang tinguha ni Rama a aron maluagan ang naghuot na ang mga binilango sa matag police station.
Apan matod ni Police Lieutenant Colonel Janette Rafter, hepe sa Operation Branch sa CCPO, dili pa tanang detention cell sa onse ka police stations ang naghuot sa pagkakaron.
Apan adunay panahon nga maghuot kini ilabi na sa panahon nga molusad silag dungan nga anti criminality operations diin daghan sila og madakpan ug dugay usab nga masulod o mabalhin sa Cebu City Jail.