Kerwin, laing 2 misuway og eskapo sa prisuhan

Gihugtan sa National Bureau of Investigation (NBI) ang ilang seguridad sa prisuhan nunot sa pakyas nga pag-eskapo ni self-confessed drug lord Rolan “Kerwin” Espinosa ug laing duha ka mga piniriso gikan sa NBI detention center.

Si NBI Director Eric Distor niingon nga Lunes, Enero 17, 2022, ang hingtungdang mga unit sa NBI nakadawat og impormasyon nga si Espinosa ug laing duha ka mga piniriso nagplanong moikyas niadtong Huwebes, Enero 13.

Matod niya nga nakaaghat kini sa iyang mga sakop sa pagpahigayon og inspeksyon sa mga detention cell ug nakit-an ang usa ka deformed exhaust fan sa kisame.

Sa dihang gikuha ang exhaust fan, ang mga inspektor nakakita og usa ka lungag nga haom sa usa ka piniriso aron makaikyas.

“In view of this incident, security measures at the jail have since been tightened with regular inspection of all jail facilities,” matod ni Distor.

Kasong paglapas sa Comprehensive Dangerous Drugs Act of 2012 ang giatubang ni Espinosa hinungdan sa iyang pagkabilanggo.

Una siyang gitanggong sa custodial center sa Philippine National Police sa Camp Crame, Quezon City human sa iyang pag-abot gikan sa Abu Dhabi diin siya gidakop niadtong Oktubre 2016, human ang iyang amahan nga si anhing Albuera Leyte Mayor Rolando Espinosa Jr., nilambigit kaniya sa illegal nga operasyon sa drugas.

Hinuon, nihangyo siya sa korte nga ibalhin siya sa NBI detention facility alang sa proteksyon human niya gitumbok ang pipila ka mga pulis nga nalambigit sa iyang mga ilegal nga transaksyon.

Si Espinosa gibalhin sa pasilidad sa NBI niadtong Disyembre 2016 diin gipaubos usab siya sa provisional coverage sa Witness Protection Program sa Department of Justice.

Ang amahan nga Espinosa gipusil sa mga pulis sulod sa iyang detention cell sa prisohan sa Baybay City, usa ka bulan human sa pagdakop sa iyang anak.

Giingong nakig-away siya sa mga pulis nga nisilbi niadto og search warrant batok kaniya tungod sa drugas ug illegal possession of firearms. (TPM sa SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph