Oplan Bulabog sa kapulisan sa dakbayan sa Sugbo nakasikop og 148 ka mga tawo atol sa Sinulog night sulod sa mga imnanan ug sudlonong mga sitio sa kabarangayan nga nagsadya atol sa Pista Señor sa Dominggo, Enero 16.
Nisaka ang gidaghanon sa mga nadakpan sa kapulisan sa siyudad sa Oplan Bulabog atol sa gabii sa kapistahan sulod sa mga imnanan lakip na sa mga sudlonong sitio sa kabarangayan nga nagsadya bisan sa lawom na nga kagabhion.
Sa talaan sa operations branch sa Cebu City Police Office, ilang giinspeksyon ang 240 ka mga establisemento, diin 148 ang nadakpan, 130 niini mga hamtong na ug 18 ang mga menor de edad nga gi rescue sa mga operatiba.
Sa 148 nga nadakpan, 92 ang nakalapas sa curfew, 22 ang naabtan sa kapulisan nga way facemask nga nag suroy-suroy sa gawas.
Matod ni Police Lieutenant Colonel Alan Rosario, hepe sa Police Community Relations sa CCPO, nga misaka ang ilang nadakpan tungod kay gihingusgan pa nila sa pagpatuman ang mga lagda nga giluwatan ni Cebu City Mayor Michael Rama nunot sa pagsulbong sa mga kaso sa coronavirus disease 2019 (Covid-19).
“Unang una, masasabi natin kung bakit tumaas yun dahil siguro intensified yung operation. Yung pag implement ng Oplan Bulabog natin ng ating kapulisan, hindi lang kami sa main thoroughfare, pati sa kasulok-sulokan is pinapasok narin natin para masiguro natin na ma implement po natin ang mga city ordinance in relation po sa Covid 19 situation sa Cebu city,” matod ni Rosario.
Dugang ni Rosario nga ilang gipangsulod ang mga sitio sa kabarangayan, lakip na ang mga imnanan nga adunay mga nanag inom ug nagsadya atol sa Sinulog night.
Dugang ni Rosario nga bisan sa Pista Señor, gipatuman gihapon ang curfew nga nagsugod sa alas 11 sa gabii alang sa mga hamtong ug alas 10 sa mga menor de edad.
Ning pagsaka sa mga kaso sa Covid 19 sa dakbayan, giawhag sa kapulisan nga tumanon ang minimum health standard sama sa pagsul-ob kanunay sa facemask ug social distancing.
Apan dunay pipila nga wala na motuman niini, ilabi na sa mga sudlonong bahin sa kabarangayan sa pagtuo nga dili na maabot ang mga pulis uban sa mga barangay tanod aron mag roving.