Misobra na sa usa ka buwan ang pag-igo ni Bagyong Odette sa Sugbo ug kanait nga mga lalawigan sa Visayas ug Mindanao. Liboan pa gihapon ang way suga, tubig ug internet connection diin kadaghanan kanila nangaliyupo nga sa labing daling panahon mahibalik na aron mamahimo nang normal ilang gimbuhaton matag adlaw.
Sa atong panukiduki, ang Visayan Electric nagpahibawo pinaagi sa ilang Facebook (FB) page nga sa 474,182 nga apektado nilang customer, anaa na sa 324, 216 niini ang ilang napasiga hangtod sa udto sa Enero 16. Ilang gipasalig nga sa Enero 31 ning buwana mahingpit na nila ang pagpasiga sa tanan nilang kustomer sud sa ilang franchise area gikan sa Liloan ngadto sa San Fernando.
Ang Metropolitan Cebu Water District (MCWD) sa ilang FB Page nagpahibawo usab nga sukad niadtong Enero 11 moabot sa 88.2 porsiyento ang ilang napaagasan sa ilang franchise area pinaagi sa generator sets, pagsuga na sa Veco ug pagpaandar sa pump sa ilang bulk water supplier. Niini, anaa sa 211, 782 cubic meters matag adlaw ang ilang na-produce nga tubig alang sa ilang mga konsumidor nga 240,000 cubic meter ang ilang gikinahanglan matag adlaw.
Samtang, ang mga telecommunication companies (Telcos) sama sa PLDT, pinaagi usab sa ilang FB page, 92 porsiyento na sa wireless ilang napabalik sa operasyon samtang sa fixed anaa sa 80 porsiyento base sa ilang pahibawo niadtong Enero 14. Ang Globe Telecom nipadayag sa ilang pahibawo sa FB page nila nga bisan og hinay ang “connectivity” apan nabalik na kini ug nag-awhag nga i-restart ang mobile phone ug modems aron mamahimo nang normal.
Niini nga sitwasyona, atong ipaabot ang atong pasalamat sa tanang naningkamot ug nagbudlay aron mahinayhinay sa pagbalik ang atong suga, tubig, ug internet connection. Silang nagpahigayon niini, biktima usab sa pagmangtas ni Bagyong Odette ug ang uban kanila giuna ang trabaho, wa panumbalinga ang unsay ilang gidangatan.
Dili sad makiangayon nga ang atong emosyon sama pagkasuko kanunay ang mopatigbabaw sa matag higayon nga nibisita ta sa ilang mga buhatan ning kompaniya, nanawag kanila, ug nag-email nganong nisobra na sa buwan wa pa lang gihapon ang atong suga, tubig ug internet connection. Di sad baya ni sila mga robot nga usa ka ka tayhop mahuman dayon nila.
Alang sa mga komentaryo ug sugyot email sa josephelvirtubilan@gmail.com.