Duna pa gani daghang mga dapit nga nag-ilaid pa sa tumang kalisod tungod sa epekto sa bagyong Odette, nia na sab ning problema karon sa paspas nga pagkatap sa Covid-19.
Dinhi lang sa Dakbayan sa Sugbo, gikan sa duha na lang unta ka kaso sa Enero 1, 2022, niabot na kini og kapin sa 2,500 base sa talaan sa Department of Health (DOH) 7 sa Enero 16, 2022, tangkod usab nga usa ka buwan human sa pagkuso-kuso sa bagyo. Sa Enero 15 ug 16, dunay kapin sa tag 400 ka kaso ang natala.
Bisan tuod kon wa pay kompirmadong pagpanakod sa Omicron variant sa Sars-CoV-2 dinhi sa Sugbo, apan ang health authorities nagduda nga duna nay pagpanakod niini dinhi sa Sugbo tungod sa kapaspas. Mao ni ang nahitabo karon sa National Capital Region (NCR), diin gikompirmar na sa DOH nga duna nay local transmission kun pagpanakod sa Omicron didto.
Hayan ang pagpanakod sa Covid-19 gipakusog pa tungod sa epekto sa bagyo kay ang mga tawo nagtapok na man sa pag withdraw og kwarta, pagdawat og mga hinabang, pagkuha og supply sa tubig ug uban pa.
Daghan na sab ang kompyansa human sa bagyo, gawas nga wa nay hapit social distancing, daghan ang wa magsul-ob og facemask, labina sa mga party sa Pasko ug Bag-ong Tuig. Kining tanan puro super spreader nga mga kalihukan.
Maayo na lang gani kay bisan tuod sa kapaspas sa pagkatap, minos pa kaayo ang mga pasyente nga nangasulod sa ospital. Gikan sa Enero 1, usa pa lang usab ang gitaho nga namatay sa Covid-19. Maayo nga mga tilimad-on.
Namatud-an na man nga kon ang tanan mosunod lang sa health protocols, mag-anam og kanaug ang gidaghanon sa mga kaso matag adlaw. Bisan tuod kon maingon nga di isog ang Omicron, maayo gihapon nga managana, manalipod sa kaugalingon aron kalikayan nga dunay motumaw nga dakong problema. Kahibawo na man ta sa unsay angay buhaton.