Giklaro sa Land Transportation Franchising and Regulatory Board (LTFRB) Central Visayas nga wala gipatuman sa Sugbo ang ‘no vaccine, no ride’ policy.
Si LTFRB 7 Director Eduardo Montealto Jr. niingon sa SunStar Cebu Lunes, Enero 17, 2022, nga bisan pa sa pagsaka sa Alert Level 3, ang guidelines nga gi-issue sa Department of Transportation (DOTr) naglangkob lang sa Metro Manila.
Ang no vaccine, no ride gisugdan pagpatuman sa National Capital Region (NCR) sa Lunes, Enero 17.
Gipakatap ang kapulisan sa Metro Manila aron pagsusi sa public transportation.
Ang Department Order No. 2022-001 sa DOTr nag-ingon nga ang mga fully vaccinated lang ang gitugotan nga makasakay sa bisan unsang pampublikong transportasyon.
Giangkon usab ni Montealto nga bisan pa sa ilang inadlaw-adlaw nga operasyon batok sa overloading, daghan gihapon ang mga drayber nga nakalapas sa 70 porsiyento nga maximum passenger capacity nga gitakda sa Inter-Agency Task Force.
Dako usab ang panginahanglan sa mga pampublikong sakyanan ilabi na panahon sa rush hours apan wala magtinguha ang ahensya nga dugangan pa ang mga PUV sanglit makatampo kini sa kahuot sa trapiko, matod ni Montealto.
Giawhag usab ni Montealto ang mga local chief executives nga paspasan ang paghimo sa Local Public Transport Route Plan (LPTRP) nga maoy usa sa posibleng solusyon aron matubag ang problema sa pampublikong transportasyon sa Metro Cebu.
Ang LPTRP mag-ila sa mga ruta nga sobra o kuqang sa serbisyo sa mga PUV.
Matod ni Montealto nga overserved ang usa ka rota kun mas daghan ang mga PUV nga mobyahe kon itandi sa aktuwal nga gidaghanon sa mga pasahero sa maong dapit samtang sukwahi ang kaatbang nga rota.
Sa higayon nga makasumite na ang Local Government Unit (LGU) sa ilang route plan, ang LTFRB mo-issue og permit sa mga PUV aron madugangan ang maong mga rota nga wala kaayo maserbisyuhi, matod ni Montealto.
Dugang ni Montealto nga nagsugod ang programa niadtong 2017 apan hangtod karon ang dakbayan sa Mandaue lang ang nakasumiter og route plan.