Di motuman ang Liga sa mga Barangay sa Dakbayan sa Lapu-Lapu sa hangyo sa Department of the Interior and Local Government (DILG) nga kinahanglang mo-resign o magbakasyon ang mga opisyal sa barangay nga wala pa mabakunahi.
Si Bankal Barangay Captain ug Liga ng Mga Barangay President Eduardo Cuizon nitug-an sa SunStar niadtong Lunes, Enero 17, 2022, nga ang maong kamanduan unconstitutional.
Si Cuizon niingon nga way bisan usa ka probisyon sa Local Government Code of 1991 nga ang dili mabakunahan maoy basehan sa pag-resign sa usa ka elected official.
Kini human niawhag si DILG Undersecretary for Barangay Affairs Martin Diño sa Dominggo, Enero 16, nga ang barangay officials nga wala pa mabakunahi kinahanglang mokanaog o mo-leave of absence samtang anaa pa ang coronavirus disease (Covid-19) pandemic .
Gisaway ni Cuizon ang DILG tungod sa pagtratar niini sa mga opisyal sa barangay.
“Ilang pagtuo ulipon kaayo nila ang barangay officials, wala ko kasabot sa mandate nila nga grabe ang treatment namo,” matod ni Cuizon.
Si Diño niiingon nga kon duna may barangay official, labina mga barangay kapitan, nga wa pa mabakunahi batok sa Covid-19, di sila maayong mga ehemplo sa ilang mga konstituente.
“Kung talagang hindi pa bakunado, pwede naman kayo mag-resign o mag-leave kayo habang hindi pa tapos ang Covid-19 pandemic. Nakakahiya kayo. Biruin n’yo, kayo nagpapatupad ng batas tapos kayo pala ang hindi bakunado,” matod niya sa usa ka interview.
Gitataw ni Diño nga way exemptions sa balaud ug bisan gani ang barangay officials mahimong masikop kon wa sila mosunod sa restrictions nga gipatuman alang niadtong nagdumili sa pagpabakuna. (SunStar Philippines)