Negusyante nga giingong wala mobayad sa iyang utang nga P500 sa ilang silingan atol sa usa ka tigbakay, gitigbas sa giingong iyang giutangan alas 10:30 sa gabii sa Dominggo, Enero 16, 2022 sa Lower, Brgy. Awihao, dakbayan sa Toledo.
Kada paningil giingong wa siya makahinumdom nga duna siyay utang sa suspek, kinsa mas dako na hinuon og problema tungod sa iyang nabuhat nga krimen.
Si Charlie Benihagan Caro, 32, minyo, taga Sitio Poro, Brgy. Awihao, samdan sa iyang tuong tudlo nga singsingan human niya nasagang ang tigbas ni Roel Lee Gepitulan Cabuenas, 27, dunay kapuyo, tireman sa trucking company, taga Sitio Poro, Awihao.
Si Cabuenas nasikop sa follow-up operation sa kapulisan.
Si Police Master Sgt. Roy Olasiman sa Toledo Police Station nga nahinabi sa Superbalita Cebu nagkanayon nga si Caro nanglingkod gawas sa iyang sari-sari store dihang kalit nga niabot si Cabuenas nagdala og sundang, iyang gitigbas ang biktima tumong sa liog.
Apan maayo gani kay nakabantay si Caro, iyang nasagang ang sundang sa iyang duha ka mga kamot, hinungdan nga naigo ang usa ka tudlo.
Nakadagan ug nakapangayo og tabang si Caro sa iyang mga kabanay nga maoy nidala sa kaniya sa tambalanan.
Si Cabuenas nidagan paingon sa ilang balay, apan nasikop sa kapulisan nga ningresponde sa alarma.
“Naglagot ning suspek kay wala mobayad ang biktima. Naglalis sila kay kon maningil, motubag raman nga “wala ko kahinumdum naay utang nimo (Cabuenas)”. Pwerte niyang (Cabuenas) lagota,” dugang ni Olasiman.
Ang utang nga P500 atol kini sa usa ka tigbakay di pa lang dugay.
Si Caro napildi sa tigbakayan hinungdan nga nangutang siya kang Cabuenas aron makabayad.
Gumikan kay kaila sila, giingong gipautang ni Cabuenas si Caro kay naluoy sab nga wala nay ikabayad human napildi sa manok nga gipustahan.
Si Cabuenas nisulti sa kapulisan nga maayo kaayong mipasalig kaniya si Carbo nga bayran siya.
Apan naabtan nalang og buwan, wala gyud mobayad hinungdan sa iyang kalagot.
Sa Lunes sa hapon, Enero 17, napasaka ang kasong frustrated murder batok kang Cabuenas.