ANDAM si Ormoc City Mayor Richard Gomez nga ipakita ang iyang Statement of Assets, Liabilities and Net Worth (SALN) sa publiko aron mahibaw-an nga wa siya'y gitago nga binuang isip usa ka lider.
Giawhag usab ni Gomez ang iyang mga kaatbang sa politika nga ipakita usab nila ilang SALN alang sa kasayuran sa mga Leyteños.
"Kung di sila magpakita sa SALN, aw basin naa sila'y gitago. Ang akong SALN, akong ipakita. Bisan kinsang kandidato, magpakitaay ta og SALN," matud ni Gomez sa interview sa Krusada radio program.
Alang kang Gomez, mas maayo nga makita sa katawhan ang ilang SALN aron mahibaw-an kung pila ang ilang net income.
"Sa panahon nga wala pa mi sa pulitika, paspas kaayo ang increase, dagko kaayo amo'ng income. In fact, pagsud namo sa pulitika mihinay siya kay mas daku pa ako'ng income sa pagka artista. Di man sa paghinambog, ang akong sweldo sa pagka mayor, ang usa ka buwan let's say P100,000, kanang P100,000 pag artista naku, usa ka adlaw lang na. Kining gibuhat nako pagka mayor, it's really more of a sacrifice," matod ni Gomez
Gani, iya usab gisultian iyang asawa nga si Cong. Lucy Torres-Gomez nga, pwede ra siya (Richard) ang mag sakripisyo kay buot niya nga matarong ug mahapsay ang Ormoc ug ang sistema sa pang gobyerno niini.
"Gusto naku nga by the time nga mag-retire ko, moabot ang time nga matiguwang ko, ari ko sa Ormoc. Karon pa lang, gusto naku okay na ang Ormoc City, hapsay na ang Ormoc, maayo na ang sistema diri sa gobyerno. Again, priority gyod naku sa ako'ng administration ang peace and order kay tanan development mosunod ra basta hapsay ug malinawon lang ang lugar ug makatulog sab og maayo ang mga residente kay kahibalo sila nga safe sila diri sa Ormoc," ang mayor nagkanayon.
Ang kanhi matinee idol niadtong dekada 80 magpapili karon pagka kongresista sa ika-upat nga distrito sa Leyte batok kang Goyo Larrazabal.
Niadtong tuig 2012, gihagit usab sa asawa ni Richard nga si Kongresista Lucy Gomez si kanhi mayor Beboy Codilla nga ipakita ang SALN apan wala mosanong ang kanhi mayor. (JKDP, TPT)