Lalake miambak sa condo, patay

Lalake ‘miambak’ sa condo, patay diha-diha (Hulagway gikan sa Fuente police)
Lalake ‘miambak’ sa condo, patay diha-diha (Hulagway gikan sa Fuente police)

Wa mahitsura ang lawas sa usa ka 41 anyos nga lalake nga gituohang niambak sa usa ka condotel sa dan General Maxilom, Siyudad sa Sugbo sa Lunes sa buntag, Enero 17, 2022, nga niresulta sa iyang kamatayon.

Gituohan sa kapulisan nga suliran sa relasyon sa gugma ang nagtukmod sa biktima sa pagpakamatay.

Si Police Chief Master Sergeant Lydio Libres sa Abellana Police Station nga nahinabi sa SunStar, niila sa namatay nga si Karl Enerio Fernandez, kasamtangan nga lumolupyo sa Victor Village, Tres de Abril St., Barangay Labangon, Siyudad sa Sugbo, lumad nga taga Nazareth, Dakbayan sa Cagayan de Oro.

Matod ni Libres nga gituohan nga si Fernandez niambak sa ika 50 ug nitugpa sa ikasiyam.

“Tungod sa impact sa iyang pagka hulog, nabungkag gyud ang iyang tiyan ug maoy iyang gikamatay,”matod ni Libres sa interbyu sa SunStar.

Dugang ni Libres nga sa ilang nakuha nga mga kasayuran, hayan dunay problema sa gugma si Fernandez.

Nasayran sa kapulisan nga sa wala pa ang insidente, si Fernandez ug usa ka babayeng doktor (ngalan gipugngan ning mantalaan) nakita sa closed circuit television (CCTV) camera nga nagkuyog sa paggawas luwan sa itom nga pick-up truck sa lalake, base sa asoy ni Patrick Gonzalo, security officer sa edipisyo.

Ang nakita babayeng sa CCTV ug ang identification (ID) card nga lakip sa nakuhang mga butang gikan ni Fernandez nagtukma.

Mga usa ka oras kapin ang milabay, si Fernandez nibalik nga nag-inusara na lang ug dayon nisaka sa building.

“Pila ka minuto nakadungog na ang mga nag puyo didto og kusog nga lagapak. Ug mao na to ilang nang nakita ang tawo sa ika 9th floor sa building nga nagkulob ug wala nay kinabuhi,” dugang nj Libres.

Subay sa pakigkooperar sa mga nag duty nga mga kawani sa edipesyo, nakit-an sa kapulisan sa CCTV si Fernandez nga nisuway pa sa pagsaka sa labing tumoy sa building, apan tungod kay sirado ang pultahan sa rooftop, nibalik kini sa iyang agi ug nikanaog sa ika-50 nga andana ug dayon niambak.

Patay na si Fernandez dihang naabtan sa Emergency Medical Service (EMS) sa Siyudad sa Sugbo tungod sa grabeng kadaut sa iyang kalawasan.

“Mao ni sa among nakita nga posibleng nag away ning duha ug sa pagbalik sa biktima tungod kay wala na kasabot sa kaugalingon, niambak sa building. Pero padayon pa atong imbestigasyon ha,” dugang ni Libres.

Samtang lakip usab nga imbestigahan sa kapulisan sa Abellana Police Station kon kang kinsa nakapangalan ang condo unit nga giabangan sa duha tungod kay bisan asa kanila wala nakarehistro ang ngalan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph