BANSALAN, Davao del Sur -- Samdan ang tulo ka mga indibiduwal apil ang usa ka bata sa nahitabong pagbusikad sa granada sa Purok 3, Barangay Eman, Bansalan alas 3:10 sa hapon, Enero 17, 2022.
Giila sa Bansalan Municipal Police Station ang mga biktima nga sila Joswe Llaneta, 50-anyos; Abloy Villaroya; ug ang 5-anyos nga si Mark.
Base sa report sa Bansalan police, nagsugod ang kagubot sa dihang nagsiyagit-siyagit ang usa ka giingong Ricky Agbo kinsa bitbit ang sundang ug nanghagit og away.
Higayon nga miabot ang Cafgu nga si Egliserio Bacus, 55-anyos, hubog ug nakalalis si Joswe Llaneta sa dihang kalit niining gitanggal ang pin sa granada ug giitsa sa yuta hinungdan nga naigo ang mga biktima.
Daling gidala sa Viacrusis Hospital ang mga biktima samtang gi-aresto sab ang suspek nga Cafgu.
Nakuha sa iyang posisyon ang usa ka Cal. 38 nga may lima ka mga bala ug narekober sa crime scene ang usa ka metallic fragment.
Giandam na ang kaso nga ipasaka batok sa suspek didto sa korte.