ANAA na sa "high-risk status" ang Davao City human ang pipila ka mga semana nga anaa kini ubos sa non-high-risk status.

Base kini sa "high" two-week growth rate (2WGR) ug "medium" Average Daily Attack Rate (Adar) sa latest Covid-19 Task Force report.

Sa report sa Covid-19 Task Force niadtong Enero 16, nakatala ang Davao City og 493 ka mga bag-ong kaso, hinungdan nga miabot sa 2,229 ang ihap sa mga aktibong kaso sa Covid-19.

Ang positivity rate miabot og 23.6 percent, mas taas kung itandi sa 5 percent acceptable positivity rate.

Kung ikumpara sa mga milabay'ng semana, walay natala nga mga critical risk barangays ang siyudad sa Davao.

Karon, duna na'y 18 ka mga critical risk barangays ang Davao City, 20 ka mga high-risk barangays ug 33 ka mga moderare risk barangays.

"Duna pud tay Covid-19 surge of cases so please take extra precaution if you have to, mag-double mask mo sa mga lugar nga daghan og tao sama anang palengke, malls. Practice distancing magpalayo gyud ta pirmi sa mga tao and dad-on nato ang atoang mga alcohol. Magpabakuna ta, duha ka doses pagkahuman kuhaon pud nato ang atoang booster shot. Mao na ang atong kinahanglan buhaton for Covid-19," pasidaan ni Mayor Inday Sara Duterte atol sa programang Special Hour with Mayor sa Davao City Disaster Radio niadtong Lunes, Enero 17, 2022.

Gikan sa pagsugod sa pandemya niadtong 2020, aduna nay 56,175 ka mga Covid-19 cases nga natala ang Davao City.