GIKANAYON sa mga opisyal sa gobyerno nga "game over" na alang sa Southern Mindanao Regional Committee (SMRC) sa Communist Party of the Philippines–New People's Army (CPP-NPA) tungod kay ang ilang mga lider nanurender na ngadto sa puwersa sa kagamhanan.

Gisulti ni Colonel Consolito Yecla, commander sa 1003rd Infantry Raptor Brigade, sa press conference nga ang Sub-Regional Committee 5 (SRC5) sa SMRC malampusong nabungkag kay ang tibuok liderato sa maong yunit misurender nga ngadto sa tropa sa kagamhanan niadtong Enero 10, 13 ug 16, 2022, didto sa Sitio Minalong, Barangay Kahusayan, Kitaotao, Bukidnon ug Sitio Sambulungan, Barangay Palma Gil, Talaingod, Davao del Norte.

Ang kinatibuk-ang 14 ka mga miyembro sa CPP-NPA misurender ug nagbitbit sa ilang siyam ka mga tag-as nga kalibre sa armas ug duha ka mubo nga mga pusil.

Gitaho ni Yecla nga ang SRC5 maoy tinubdan sa rekrut sa mga NPA sa SMRC.

Ang grupo, matud pa, mao sab ang nagpatuman sa Haran Bakwits gikan 2014 hangtud 2021.

Dugang pa niini, gimugna sab nila ang Salugpungan Ta'Tatanu Igkanugon Learning Center Inc. Mindanao Interfaith Services Foundation Inc. (Misfi), nga nalambigit sa mga institusyon nga giingong nagtudlo sa mga tinun-an kon unsaon paggamit og armas, gawas sa pagdoktrina sa pagpropaganda batok sa gobyerno.

Gisulti ni Yecla nga ang pagkahagba sa SRC5 nabati human nga si Ariane Jane Ochate Ramos, alyas Marikit, secretary sa Guerrilla Front 55 sa SRC5, misurender ngadto sa militar sa Pikit, North Cotabato niadtong Agosto sa miaging tuig, kinsa mabdos niadtong higayona.

Si Ramos, sa laing paghinabi, nagsulti nga nakahukom siyang mosurender aron nga mahimong inahan sa iyang anak.

Gibutyag niini nga ang pagkabungkag sa SRC5 dunay dakong epekto sa operasyon sa komunistang grupo.

"Ang dismantling ng SRC5 ng SMRC ay napakalaki kasi ang SRC5 ay baston ng NPA recruitment sa SMRC. Dahil wala na ang name-passing guerrila, mahirap nang umusad pa para sa pagsulong ng People's Democratic Revolution," tug-an ni Ramos, dugang sa pag-ingon nga dunay posibilidad nga ang SMRC mahagba bisan unsang higayon.

Subay sa lain sab nga rebeldeng misurender nga si Ida Marie Montero alyas “Mandy” atol sa inisyal nga paghinabi nagkanayon, "Game over na kami, sir."

"We already heard the fate of SRC5. It is game over. But before we hit the final buzzer, we have another game to play, which is to sustain peace and development in our AOR [area of responsibilty]," pasalig ni Yecla.

Samtang si Major General Ernesto C. Torres Jr., commander sa 10th Infantry Division, nagkanayon nga ang pagkabungkag sa SRC5 sayo pa sa gitakda nga "timeline" ni Presidente Rodrigo Duterte.

"This is the reality on the ground as opposed to the lies being peddled by the CPP Information Bureau that they still have strong cadres and mass bases. Our joint Intelligence, Focus Military Operations (FMO) and purposive CMO operations led to the destruction of SRC5 and SRGU of the Southern Mindanao Regional Committee," pasalig ni Torres.

Nanawagan sab siya sa lain pang mga miyembro sa komunistang grupo nga mosurender na ning sayo pa.