LALAKE nga nag videoke gibadlong sa iyang kapuyo nga giingong gisabaan kay “bati og tingog.”
Inay mopatuo, nasuko, nga nisangko sa sinugmagay tali niya ug sa iyang silingan nga niuwang kanila.
Apan siya namatay human mapantok ang ulo sa yuta pagkatumba sa alas 7 sa Lunes sa gabii, Enero 17, 2022 sa sityo Tagaytay, Barangay Matutinao, lungsod sa Tabuelan.
Ang biktima giilang si Federeco Mamolo Paller, 33, mag-uuma, kinsa patay nang niabot sa tambalanan human na hemorrhage dihang napantok ang ulo.
Nasikop ang suspek nga giilang si Jomar Bongco Ruelo, 27, mag-uuma, ulitawo, silingan.
Si Police Staff Sgt. Marlon Montesclaros, sa Tabuelan Police Station nga nahinabi sa Superbalita Cebu nagkanayon nga si Brgy. Captain Felix Rubin sa Matutinao maoy mipahibawo sa kapulisan kabahin sa insidente.
Matod ni Montesclaros nga hubog si Paller samtang si Ruelo nakainom sab samtang nagtagay uban sa mga higala ug nagkalingaw og videoke.
Pagka-alas 6:00 sa gabii, sila si Paller ug iyang kapuyo nga si Melenda Tuling Camay, nagkalalis.
Si Melinda nibadlong kang Paller nga mohunong na sa pagkanta sa videoke sulod sa panimalay sa ilang silingan.
"Gisabaan na ang asawa guro ba kay bati kaayog tingog, alingisig kay lagi hubog na, gibadlong nasuko hinuon," dugang ni Montesclaros.
Si Ruelo nipatunga tali sa magtiayon, nihangyo kang Paller nga moundang na lang sa pagkanta aron dili na modako ang ilang lalis ni Melinda.
Giingong natandog ang garbo ni Paller kay hubog na, iyang gitukmod si Ruelo dayon nilakaw, niadto sa tindahan sa ilang silingan.
Si Ruelo nga nasuko ug naglungotlungot kay gitukmod, nagpaabot kang Paller nga mobalik.
Nianang mga mga alas 7:00 sa gabii na mibalik si Paller, hinungdan nga gisukna ni Ruelo og sinumbagay
Si Paller wala mosukol sa hagit ni Ruelo og sinumbagay, nisulod sa ilang balay kay matulog.
Apan nagsige og panangpit si Ruelo, nanghagad og sukmagay kang Paller.
Nigawas si Paller nga nahagit dayon nag-atubang ang duha.
Mga silingan nisuway sa pag-uwang sa duha, apan niatake si Ruelo kang Paller, kinsa nasukmagan sa baba.
Natumba si Paller ug napantok ang ulo sa yuta.
Matod ni Ruelo sa interbyu sa Superbalita Cebu, si Paller nipunit og bato kay labayon unta siya hinungdan nga iyang giunhan pagsukmag.
Patay nang nang niabot sa tambalanan sa Bogo si Paller samtang si Ruelo gibilanggo sa Tabuelan Police Station ug gihikay pa ang kasong homicide batok kaniya. (GPL)