Mibangon gikan sa dakong kapildihan ang hosts Los Angeles Lakers ug ilang gipahimungtan ang Utah Jazz, 101-95, kagahapon, Enero 18, 2022 (RP time) sa National Basketball Association (NBA) 2021-22 season.
Ang Lakers, nga nakasinati og 37 puntos nga pagkalubong sa miagi nilang duwa batok sa Denver Nuggets, gipangulohan ni LeBron James pinaagi sa iyang 25 puntos samtang ningdugang og 15 puntos matag usa sila si Russell Westbrook ug Stanley Johnson.
Ning sangkaa, tataw ang pagkaagresibo sa Lakers sa tinguha nilang makabangon gikan sa tulo ka sunodsunod nga kapildihan.
Ningsaka ang Lakers sa ikawalo nga dapit sa Western Conference dala ang 22-22 nga rekord.
Si Stanley, kinsa bag-o lang mipirma’g balik sa Lakers og 10 ka mga adlaw nga kontrata, kuyaw nga nakaduwa sa 4th quarter diin niya gimugna ang 10 sa iyang kinatibuk-ang puntos.
“I’m just trying to put everyone in position to be successful and reading the game while the game was going on and I knew the way we could be successful offensively,” matod ni James. “The guys responded well to what I saw and Stanley had a big-time game.”
Ang Jazz, nga natagak sa 29-15 nga rekord – ikaupat sa West, gipangulohan ni Mike Conley pinaagi sa iyang 20 puntos, ningdugang og double-double nga 19 puntos ug 16 rebounds si Rudy Gobert, samtang niamot og 13 puntos matag usa sila si Royce O’Neal ug Donovan Mitchell.
“I thought we had too many really tough shots,” batbat ni Jazz coach Quin Snyder. “I think some of the shots are makable but we made it harder on ourselves than it needed to be as far as making better reads and moving the ball quicker and generating some better shots. I think that showed.” (AP)