Sa pagsugat sa bag-ong tuig, nadugangan ang mga balaod nga nagtinguha sa pagpanalipod sa mga bata diri sa Pilipinas.
Gawas sa balaud nga naghunong sa child marriage nga nahisgutan sa susamang lindog sa miaging semana, gipirmahan ni Presidente Rodrigo Duterte ang Republic Act No. 11642 o ang “Domestic Administrative Adoption and Alternative Child Care Act”. Napirmahan ang maong balaod niadtong Enero 6.
Tinguha sa bag-ong balaud nga mahimong simple ang proseso sa pagsagop sa Pilipinas.
Ang pagpasar sa balaud usa sa mga pamaagi sa estado nga masiguro nga mahatagan og “alternative care options” ang mga bata nga walay ginikanan o dunay risgo nga mawagtangan og parental care sama sa adoption ug foster care.
Ang kalahian sa adoption ug foster care mao nga ang adoption usa ka proseso nga ang tumong mao ang paghatag og permanente nga pamilya ngadto sa qualified nga bata samtang ang foster care usa lang ka temporary substitute parental care.
Ang usa ka adopted child makonsiderar nga lehitimo nga anak sa iyang adoptive parents.
Sa maong balaud gimando sab ang pagtukod og sistema uban ang Inter-Agency Council Against Trafficking (IACAT) aron malikayan ang pagbaligya, pagdagit ug pagpaubos sa human trafficking sa mga bata ug mapanalipdan ang mga batang Pilipino nga giabandonar sa ubang nasod.
Klaro ang Anti-Trafficking in Persons Act nga ang pag-adopt nga dunay tinguha sa pagpaubos sa krimen nga trafficking mahimong silotan depende sa gibuhat sa sad-an sa maong balaod sama sa mga krimen nga acts of trafficking, attempted trafficking, ug qualified trafficking.
Ubos sa Domestic Administrative Adoption and Alternative Child Care Act, tukuron sab ang National Authority for Child Care (NACC) nga maoy mahimong “one-stop” nga ahensya alang sa mga concerns kabahin sa alternative child care.
Pinaagi sa pagtukod sa NACC, ma-re-organize na ang Inter-Country Adoption Board o ICAB. Ang NACC usa sab ka attached agency sa Department of Social Welfare and Development (DSWD).
Ang NACC dunay orihinal ug ekslusibo nga jurisdiction sa mga matang sa alternative child care. Lakip na niini ang pagdeklarar sa mga bata nga legally available for adoption, domestic administrative adoption, adult adoption, foster care, adoption ubos sa Simulated Birth Rectification Act, ug inter-country adoption.
Ang maong ahensya sab ang adunay otoridad sa pagpatuman og mga silot sa mga kalapasan sa maong balaod.
Lakip sa mga gidili nga akto ubos sa maong balaod mao ang pagpugos o pag-ilad aron makuha ang pagtugot sa pagpasagop, non-compliance sa mga proseso nga gilagda sa mga adoption laws, ug pagpangabuso o pagpanghimulos sa usa ka saguponon nga bata.
Hinaot nga sa pag-usab sa adoption laws pinaagi sa pag-apbrubar sa Domestic Administrative Adoption and Alternative Child Care Act, maka-agni kini sa mga Pilipino nga musagop og mga bata nga nanginahanglan og pag-amoma og pagtagad labaw na sa panahon karon nga puno sa kalisdanan mahitungod sa pandemiya.
[Lindog sinuwat nilang Atty Joan Dymphna Saniel-Amit, Executive Director, ug Atty. King Anthony Perez, usa sa mga abogado sa Children’s Legal Bureau. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]