Dakong planta sa butane sa dakbayan sa Danao gironda sa kapulisan uban sa Department of Energy (DOE) 7 human masuta nga illegal kini nga mo refill og laing brand sa butane canisters.
Ang target sa mga operatiba mao ang FMZ LPG Center nga gipanag-iya ni Sheila May Palay Zenith, nga nahimutang sa Barangay Dungguan, Siyudad sa Danao.
Matod ni manlalaban Russ Mark Gamallo, director sa DOE 7, nga ang FMZ LPG Center lehitimo nga planta sa LPG sanglit aduna silay permit gikan sa ilang ahensya nga maka baligya sa Botin liquiefied petroleum gas nga maoy produkto niini.
Apan nakadawat silag reklamo gikan sa wala nganli niini nga reklamante nga gawas sa Botin LPG, nag refill ang planta og laing canisters nga walay standard compliance certificate nga dakong kalapasan sa balaod.
Gumikan niini nakig alayon dayon ang DOE 7 sa kapulisan sa siyudad sa Danao aron aksyonan ang reklamo nga ilang nadawat.