Suspendido na ang klase sa mga tinun-an sa public schools sa dakbayan sa Talisay sugod karong adlawa, Enero 19 hangtod sa Enero 28, 2022, ma modular man o face-to-face nga paagi.
Kini maoy gianunsyo ni Talisay City Mayor Gerald Anthony “Samsam” Gullas subay sa nahiusahan niining desisyon kauban ang mga opisyal sa Department of Education (DepEd) sa siyudad.
Ang desisyon nakab-ot gumikan sa padayong pagsaka sa mga kaso sa coronavirus disease (Covid-19) sa syudad ug ang hingpit nga pagpailawom sa probinsya sa Alert level 3 quarantine classification.
“..ayaw kabalaka, according to our DepED superintendent, dili ibaylo ang inyong summer vacation sa mga na missed na adlaw ninyo because of the suspension of these school days,”matod ni Gullas.
Sa uwahing datos sa kagamhanan, nakatala ang Siyudad og 242 ka mga aktibong kaso sa Covid-19.
Pasabot ni Gullas nga bisan pa man og nakab-ot na sa Siyudad ang 70 porsyento sa mga nabakunahan, dili niya buot nga mokompyansa.
Base sa taho sa Department of Health (DOH), dili deadly ang bag-ong Omicron variant sa Covid-19 apan paspas ang pagkuyanap niini.
Tungod niini, iyang giawhag ang mga residente sa pagpabakuna na aron nga malikayan ang grabeng epekto sa pagtakboy sa sakit.
Samtang suspendido na ang pagtungha sa mga public schools, gihatagan usab ni Gullas og katungod sa pag desisyon ang mga pribadong tunghaan kalabot sa lagda nga ilang ipatuman.
“I am giving our private school administrators and officials the discretion to suspend their classes. It will be up to them if they will suspend their classes or not,” matod ni Gullas.