Mao ni istorya og unta.
Maayo unta og wa manamastamas si Odette sa mga lugar nga iyang naagian. Dili unta maguba ang daghang kabalayan, madaot ang kadalanan, mangatumba ang mga poste ug transmission towers ug dili unta mapukan ang mga tanom sa kabasakan ug hayopan.
Maayo unta og wala si Odette kay magamit unta sa ubang mga kinahanglang kagastohan ang mga minilyon nga mga salapi nga gigamit alang sa ayuda sa katawhan nga nabiktima ug ingon man ang pag-ayo sa mga nangaguba.
Ug maayo unta og wala mohapak si Odette kay basin wala na mosaka ang gidaghanon sa kaso sa Covid nga maoy hinungdan nga gipa-ubos na sab as Alert Level 3 ang daghang lugar sa nasod.
Kon wala pa si Odette, unya wala ipakanaog ang Alert Level 3, daghan unta sa atong kaigsuonan ang padayon nga nanginabuhi.
* * *
Sumala sa mga pagtuon, ang kawayan mas dako og ma-absorb nga greenhouse gases kon ikomparar sa mga kahoy.
Ang padayon nga pagtapok sa daghan nga greenhouse gases nakita nga hinungdan sa mga kausaban sa kinaiyahan o climate change. Matod pa, ang Yolanda ug Odette resulta sa climate change.
Kon pasagdan ang greenhouse gases sa tibuok kalibotan, hayan mas kusog ug mas mabangis pa nga kalisdanan ang atong matagamtamang epekto sa atong pag-abuso sa kinaiyahan.
* * *
Dakong tabang ang pagtanom og mga kawayan sanglit panalipod kini sa paglaganap sa greenhouse gases, pangkontra sa soil erosion gawas pa sa pagkaon ug magamit sa pagtukod og balay. Ang nakanindot pa gyod, isog ang kawayan ug mosukol sa kabangis sa bagyo.
Bisan gibali na ni Odette ang mga kawayan, di mo-surrender. Makita nimo nga imbes adto lang unta sa udlot o tumoy sa kawayan mogawas ang mga salingsing nga gamiton para itanom, makita nimo sa kada buko niini nga nabali mituyhakaw ang mga salingsing.
Buot ipasabot, dili mosugot ang kawayan nga mapukan siya sa kusog nga hangin, motuyhakaw gyod ang bag-ong salingsing nga maoy sinugdanan sa laing punoan o bulos sa kawayan.
Nindot kini nga ehemplo sa katawhan nga nabiktima sa katalagman sama sa Covid o Odette sanglit makita dinhi ang resiliency sa kawayan.
* * *
Kinsa kining politiko nga gitawag og ‘cry baby.’ Imbes molihok aron atubangon ang problema, mominatay na hinuon og hilak ug magpunay og og reklamo nga way natabang kaniya ang kagamhanan.