Naningkamot ang gobyerno nga makab-ot ang herd immunity batok sa Covid-19. Sa atong kasinatian, di makapugong ang mga lockdown sa pagkatap sa maong balatian. Busa, bakuna ang gisaligan aron mapugngan ang pagpanakod niini. Ug kon matakdan man gani, di na magrabehan.
Sumala sa National Task Force against Covid-19, 54,457,863 na ka individuals ang fully vaccinated batok sa Covid-19 sa Pilipinas. Mokabat kini sa 70 porsyento sa eligible population sa nasod.
Kumusta man ang wa pa mabakunahi? Mora silag napiit sa nagkalainlaing mga direktiba ug pamahayag. Sama sa di pagawson sa balay. Kon masakpang mogawas sa balay, papaulion. Ipasikop kon mosupak. Way bakuna, way sakay. Mga way bakuna ipalista.
Duna pay warning sa usa ka dakong opisyal sa Department of the Interior and Local Government (DILG) nga kadtong mga barangay captains nga way bakuna kinahanglan nga mo-resign o kaha mo-file og leave of absence sa ilang puwesto samtang anaa pa ang Covid-19.
Si DILG Usec. for Barangay Affairs Martin Diño miluwat og warning dungan sa mando sa DILG sa opisyales sa barangay nga maghimog imbentaryo o listahan sa ilang mga katagibarangay nga wa pa mabakunahi ug sa paghatod kanila sa matinahurong paagi ngadto sa ilang balay kon maglaruylaroy sa gawas.
Dali kining gisupak ni Eduardo Cuizon, barangay kapitan sa Bankal, Lapu-Lapu City ug pangulo sa Liga ng Mga Barangay. Matod pa ni Cuizon unconstitutional ang maong kamanduan. Way bisan usa ka probisyon sa Local Government Code of 1991 nga nag-ingon nga ang wa mabakunahi sukaranan sa pag-resign sa usa ka elected official.
Gisaway usab ni Cuizon ang DILG tungod sa ilang pagtratar sa mga opisyal sa barangay. “Ilang pagtuo ulipon kaayo nila ang barangay officials, wala ko kasabot sa mandate nila nga grabe ang treatment namo,” matod ni Cuizon.
Samtang nipasidaan ang Commission on Human Rights (CHR) nga ang paglista sa mga tawo nga wa pa mabakunahi nga gimando sa DILG kinahanglan nga di mosangpot sa diskriminasyon ug paghikaw sa access sa essential goods and services kay kini mga batakan nga mga katungod ubos sa atong Konstitusyon.
Si CHR Spokesperson Jacqueline Ann de Guia miingon nga di mahimong gamiton ang Covid-19 pandemic aron isalindot ang mga balaod sa pagpanalipod sa mga tawhanong katungod ug dignidad.
Ang Department of Transportation (DOTr) misagop sa “No Vaccine, No Ride” policy sa pangpublikong transportasyon sa National Capital Region (NCR) nga ubos sa Covid Alert Level 3. Gisaway kini sa CHR kay usa ka paghikaw sa tawhanong katungod. Wa ipatuman ang No Vaccine, No Ride policy sa Sugbo nga ubos usab sa Covid Alert Level 3. (edbarrita@gmail.com)