Makapaalarma ang taho sa Visayas Vaccination Operations Center nga duna nay 22 ka kaso sa Omicron variant sa Central Visayas (CV). Una nang gibasol nga hinungdan kini sa kapaspas nga pagsaka sa bag-ong kaso sa Covid-19 sa rehiyon ug bisan sa nasudnong talaan.
Mga nag-unang simptoma sa Omicron mao ang ubo, sip-on, hilanat ug pangapoy sa lawas o trangkaso. Subo pamalandungon nga natayming usab nga panahon kini sa tuig nga tingtrangkaso tungod sa kabugnaw sa hangin nga amihan matag gabii ug ang grabe kainit sa adlawan. Mokalit pa og uwan usahay.
Tungod sa kadaghan nga gipangtrangkaso, makaingon kita nga daghang gi-Covid? Kon doktor o mga mitikuloso, sagad moambak kini sa pag-ingon nga Covid bisan wala pay pagsusi sa laboratoryo. Ang gipangtrangkaso mismo magduda na sa kaugalingon ug mahadlok tungod sa nabasa o nadungog sa mga balita sa update bahin sa virus.
Tungod sa kabalaka, nahurot ang stocks sa mga tambal sa trangkaso sa parmasiya ug klinika. Alang sa kalinaw sa hunahuna, maayong magpahiling sa doktor. Dili tanang dunay simptoma ang nagpositibo sa Covid. Dunay asymptomatic o walay gibati apan positibo hinuon sa test. Paet kini nga pandemiya.
Maghatag kanato og paglaum mao ang taho bahin sa kasinatian sa ubang nasod. Paspas motakboy ang Omicron apan dili isog nga variant.
Seguro kini ang hinungdan nga paspas ang pagsaka sa kaso sa nasod karon apan halos katugbang usab ang gidaghanon sa nangaayo. Gamay ang nakalas, kadto lang apiki nang daan ang panglawas, sumala sa taho sa Department of Health (DOH).
Sakto ang pag-adto sa doktor ug ang pagtumar og tambal. Ang labing maayong panagang sa virus mao ang lig-ong immune system pinaagi sa balanseng pagkaon ug igong pahuway. Dili maghunahuna nga murag Covid? Dili sab mokompiyansa.