Giaprobahan sa Senado niadtong Enero 17, 2022 ang balaudnon sa pag-establisar sa mga campus sa Cebu Technological University sa Lungsod sa Liloan ug Borbon sa amihanang Lalawigan sa Sugbo nga pagatawgon og CTU-Liloan Campus ug CTU-Borbon Campus.

Si Kongresista Vincent Franco “Duke” Frasco, kinsa principal author sa balaudnon, nibutyag nga giandam na karon ang mga dokumento nga pirmahan ni Presidente Rodrigo Duterte isip usa ka balaud.

Ang pagbutang og unibersidad sa maong mga lungsod gitan-aw nga dako nga kahimoan ug matampo sa pagpalambo sa edukasyon sa amihanan, ilabi na nga si Frasco anaa pa lang sa una niyang termino.

Sanglit ang edukasyon maoy prayoridad ni Frasco sa eleksyon sa 2019, iyang giduso niadtong Septiyembre 20, 2019 ang House Bill 4740 ug 4741 sa pag-establisar sa CTU campus sa Liloan ug Borbon.

Ang House Committee on Higher and Technical Education ug Appropriations nihiusa sa maong mga balaudnon isip Substitute House Bill 6877 nga tibuok nga gisuportahan sa Ubos Balay-Balauranan niadtong Hunyo 4, 2020 ug gisaka ug nadawat sa Senado niadtong Hunyo 8, 2020.

Gidepensahan ni Frasco ang iyang balaudnon ug giaprobahan sa Senate Joint Committee on Higher, Technical, and Vocational Education, Committee on Ways and Means, ug Committee on Finance niadtong Pebrero 2, 2021.

Si Senador Joel Villanueva ang nangamahan sa balaudnon sa Senate Plenary niadtong Septiyembre 28, 2021 ug hingpit nga napasar niadtong Enero 17, 2022.

Sa pagduso sa maong balaudnon, si Frasco nagkanayon nga ang pagtukod sa CTU standalone campus sa Liloan ug Borbon sa ikalimang distrito sa lalawigan sa Sugbo daku kaayo og tabang sa mga pamilya sa mga tinun-an.

Matod niya nga dili lang kay makadaginot sa gastohanan, apan ang mahinungdanon nga mahatud ang gikinahanglang edukasyon sa mga tinun-an aron makahatag sa maayong kaugmaon sa kabataan.

Sa tibuok distrito, si Frasco aduna nay kapin sa 10,000 ka scholars alang sa tuig 2021-2022. (REV gikan sa PR)