Dungan nga Oplan Bulabog sa mga police station sa Cebu City Police Office (CCPO) sa Lunes sa gabii, Enero 17 hangdot sa Martes sa kaadlawon, Enero 18, nakasikop og 248 ka mga tawo nga naabtan nga nanag-inom pa sa mga imnanan sa uptown ug downtown area sa siyudad sa Sugbo.
Bisan sa kanunay nga pahimangno sa kapulisan sa Dakbayan sa Sugbo nga likayan ang tapok-tapok ug inom lapas na sa alas 11 sa gabii, apan daghan pa gihapon ang wala mopatuo.
Sa Lunes sa gabii, nangu na ang hepe sa CCPO, Police Colonel Ernesto Tagle ug pangulo sa Prevention, Restoration, Order, Beautification and Enhancement (PROBE) team Raquel Arce uban sa 100 ka mga pulis ug force multipliers aron ipatuman ang Oplan Puyo ni Cebu City Mayor Michael Rama.
Matod ni Police Lieutenant Colonel Janette Rafter, hepe sa operations branch sa CCPO, nga atol sa Oplan Bulabog, nakadakop sila og 248 ka mga tawo, 235 niini mga hamtong, 13 mga menor de edad ilang gipang rescue.
Pasabot ni Rafter nga ilang gihingusgan ang Oplan Bulabog tungod sa pagsaka sa mga kaso sa Covid-19 sa dakbayan sa Sugbo, diin mag-average na og 600 kapin ka mga kaso ang matala matag adlaw.
Nakainspeksyon silag 343 ka mga establisemento, kadaghanan ningsunod sa direktiba sa mayor nga kinahanglan nga sa dili pa ang alas 11 sa gabii, sirado na sila ug wa nay ibaligya nga ilimnon nga makahubog.
Apan adunay pipila ka mga imnanan ang naabtan nga milapas sa lagda, bisan oras na sa curfew padayon gihapon nga namaligya sa ilang mga kustomer hinungdan nga gi isyuhan sila sa Business Permit and Licensing Office (BLPLO) og show cause order.
Sa padayon nga pagsaka sa mga kaso sa Covid sa dakbayan sa Sugbo, giawhag sa kapulisan ang publiko nga tumanon ang direktiba sa mayor sanglit alang kini sa kaayohan sa tanan.