GIKAN sa P5,000, gipausbawan sa Probinsya sa Sugbo ngadto sa P8 000 ang kantidad sa coupon cards nga mamahimong ma-redeem sa mga Sugboanon sa pag avail sa mga construction materials alang sa mga balay nga totally damaged tungod sa bagyong Odette.

Kini maoy gipahibawo ni Cebu Governor Gwendolyn Garcia sa Enero 18, 2022.

"Instead of the P5,000 worth of per card, P5,000 worth of goods that they may redeem to the LGU or to our partner merchants, we have increased this to P8,000 per card. These are for the totally damage houses," matod ni Garcia.

Apil sa makuha sa mga Sugboanon ang mga Covid-19 kits nga libreng ihatag sa Kapitolyo.

Gilangkoban kini sa vitamins, lagundi, paracetamol ug uban pang suplemento nga matabangang malig-on batok sa sakit ang panglawas.

Sa Enero 19, 2022 gisugdan na niini ang pag-apud-apod sa coupon cards ngadto sa mga lungsod ug dakbayan sa habagatang Sugbo nga maoy labing nakaangkon og grabebg kadaot sa bagyo.

Unahon sa gobernador pag apod-apud sa coupon cards ang sa 1st, 2nd ug 7th district, sundan sa 3rd district sa Huwebes ug amihanang kalungsoran sa Sabado, Enero 22, 2022.

Sa uwahing datos sa Kagamhanan sa Lalawigan, moabot og 90,000 ka mga pamilya sa 36 ka mga lungsod ang naapektohan sa bagyong Odette.

Taliwa sa giatubang nga pandemya sa Sugbo, nagtuo si Garcia nga kinahanglan nga unahon una niini ang pagrecover ug pagpabarog sa mga Sugboanon nga apektado usab sa katalagman. (ANV)