LAMI kaayong paminawon ang mga takna sa nanglabay nga panahon, labi pa kung ikaw anaa sa mga takna sa kasub-anan ug kapakyasan.
Kausa ra moagi ang higayon diha sa usa ka takna, ugma lahi na sab, busa hatagan nato kini og makahuluganon nga pagpahimulos, sa maayong buhat... alang sa kaugalingon ug sa uban.
Bisan anaa na sa tulo ug tunga nga dekada ang akong edad, pabilin gihapon kining namidpid sa lapyahan sa akong kabatan-onan diha sa paghandom sa mga higayon nga naa kos ilawom sa punoan sa Talisay, daplin sa baybayon sa among dapit sa Colongan, Barangay San Agustin, Sta. Maria Davao Occidental.
Dugay na sab ko nga wa kalaag sa akong yutang natawhan, nakatamak lang ko sa Poblacion niadtong Oktubre 2021 sa filing sa Certificate of Candidacy (COC), sugo sa trabaho nga mamahimong usa sa mokuha sa istorya sa maong hitabo.
Didto, nagkita mi sa akong ig-agaw nga si Incumbent Mayor Josephine "Joyce" Mariscal, napaila-ila pa ko niya una gisugdan ang interbyu kaniya sa mga tigbalita, malipayon siyang mi-file sa iyang COC isip Bise Mayor.
Iyang amahan nga si Rudy Pacis Mariscal, mipanaw sa miaging tuig, -- ang dugay nang mayor sa lungsod nga ilado bisan sa ulahing henerasyon sa mga bansagon sa dapit.
Pagkahuman sa coverage, lami pa kaayong di mosakay sa sakyanan diin molaag pa unta ug sud-ungon ang mga dapit nga kabahin sa akong kabatan-onan niadto. Daghan na karon og mga nindot nga resorts sa dapit, ug pabiling nindot ug anaa gihapon ang dugay na nga Little Boracay.
Luyo ning pandemya, halos magtulo ka tuig na kitang wala kaduaw sa atong mga gigikanang probinsiya... lami kaayong handumon ang mga kagahapon kung naa kita ngadto, -- handumon nga maoy makapa-presko sa atong mga hunahuna... ang mga nanglabay'ng takna sa atong kabatan-onan.
Tungod kay anaa pa man ang Covid, mas pilion gayod nato nga luwas ta, pundo sa balay kay okupado kaayo kita sa work-from-home nga paagi karon.
Kung wala na ang pandemya, lagmit mopundo gyod ka'g pipila ka gabii sa imong natawhang probinsiya, ang paglili sa mga daang hulagway nga gipang-abugan ug ang mga butang nga nanimahong kaban. Hahahaha.
Lami kaayong paminawon kana nga mga takna, labi pa kung kauban nimo ang imong mga katiguwangan, dungang mangaon, mangatawa ug mag-istorya sa kagahapong nabulit sa mga masadya nga takna. Hayyyyy, kanus-a pa ka ha?