NAG-ABOT sa presinto 3 sa Davao City Police Office ang duha ka mga babaye kinsa pulos miangkon nga siya ang uyab sa 38-anyos nga ulitawo.

Alas 3 sa hapon niadtong Martes, Enero 18, mipatala sa buhatan sa Talomo Police Station si Angela, 29-anyos, taga Barangay Matina Aplaya, Davao City, batok sa babaye nga si alyas Mariel, 35-anyos.

Una niini, nasundan ni Angela ang iyang uyab nga si alyas Charles nga mipadung sa usa ka lodging inn sa Barangay Matina Aplaya.

Giingong giapungan gyod ni Angela ang gate sa lodging inn aron siya ang makita ni Charles ug ni Mariel.

Paggawas sa duruha sa lodging inn, perteng bukal sa dugo ni Angela ug diriyot dumugon si Mariel, apan mipatunga si Charles.

Gilayon suma pang namulong si Charles nga silang duha ang iyang uyab, apan ang duha ka babaye wala kabalo nga naa diay silay karibal sa relasyon.

Wala kaantus si Angela, iyang gipusposan og bag si Mariel, hinungdan nga mibalos si Mariel og labay og kaang ngadto kang Angela, hinungdan nga gipangdampot sila sa kapulisan.

Pag-abot sa presinto, usa-usa silang nagpatala, apan gimandoan sila sa duty desk officer sa Talomo police nga modangop sila sa barangay aron didto sila maghusay.