PBA naghuwat na sa Gilas special draftees

Andam na ang Philippine Basketball Association (PBA) sa paghangop sa mga miyembro sa special Gilas Pilipinas Draft niadtong 2019.

Hinuon, nagdepende gihapon kini sa desisyon sa Samahang Basketbol ng Pilipinas (SBP) kon kanus-a nila tugtan ang lima ka gitumbok nga mga magduduwa nga makabalik na sa ilang mother teams.

"Basta 'pag sinabi ng SBP na pwede na 'yang player na 'yan sa inyo, or okay na maglaro 'yan sa PBA, okay na kami," matod ni PBA commissioner Willie Marcial nga napatik sa www.abs-cbnnews.com.

"Kailangan meron lang communication sa amin ang SBP na pwede 'tong player na 'to na maglaro sa PBA."

Lakip sa Gilas special draftees mao ang produkto sa University of the Visayas (UV) Green Lancers nga si Rey Suerte, kinsa gikuha sa Blackwater Bossing.

Gawas kang Suerte, ang ubang mga sakop sa grupo mao sila si Isaac Go sa TerraFirma Dyip, Matt Nieto sa NLEX Road Warriors, Allyn Bulanadi sa Alaska Aces, ug Mike Nieto sa Rain or Shine Elasto Painters.

Ang kontrata sa nahisgutang mga magduduwa sa SBP mo-expire human sa buwang sa Enero, 2022 apan adunay posibilidad ang kabahin sa renewal.

Gipaneguro ni Marcial nga kon buhian na sa SBP ang nahisgutang mga magduduwa, hayan motrabaho na kini sa ilang mother teams dihadiha dayon.

"Oras na sinabi sa amin ng SBP na pwede 'yang player na 'yan, welcome, ilalaro namin. Ibibigay agad namin sa team," pagtino ni Marcial.

"Siyempre, magpa-practice pa 'yan. So maganda 'yun kung maibibigay na agad sa amin."

Ang special draftees ningpakita og aksyon sa Gilas Pilipinas sa FIBA Asia Cup qualifiers ug FIBA Olympic Qualifying Tournament sa miaging tuig.