MITAAS ang ihap sa mga aktibo nga mga kaso sa coronavirus disease 2019 (Covid-19) sa dakbayan sa Cagayan de Oro.
Anaa na sa 794 ang akitbo nga mga kaso ug 154 ang mga natala nga mga bag-ong kaso sa dakbayan, duha niini mga locally stranded individuals (LSIs), lima ang mga returning overseas Filipinos (ROFs), ug 147 ang mga local transmissions.
Matud sa City Health Office, sa 147 nga mga bag-ong lokal nga kaso, 15 ang mga authorized persons outside residence (Apors), duha ang mga Apor with link, 99 ang mga local index nga mga kaso, 30 ang mga local cases with link, ug usa ang patay.
Ang Cagayan de Oro adunay 794 active cases, 194 niini na-admit sa Northern Mindanao Medical Center ug uban pang mga ospital sa syudad, 572 ang mga outpatient ug 28 ang mga ROFs/LSIs.
Nakatala usab og 13 ka mga Covid-positive nga mga kaso nga karon naka-recover. Anaa na karon sa 19,653 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 856.