Kapin sa usa ka milyon nga balor sa shabu nasakmit atol sa buy-bust pasado alas 10 sa gabii sa Martes, Enero 18 nga gilusad sa City Intelligence Unit (CIU) sa Cebu City Police Office (CCPO) sa Barangay Guadalupe, dakbayan sa Sugbo.
Ang nadakpan mao si Bambi Samson, 31, lumad nga taga lalawigan sa Siquijor, apan nagdako sa dakbayan sa Ozamiz.
Nasakmit nga shabu gikan kang Samson moabot og 180 gramos nga mobalor og P1.2 milyunes, subay sa street drug price value (SDPV).
Si Police Lieutenant Colonel Maria Theresa Macatangay, tigpamaba sa CCPO, niingon nga makonsiderar nga high value individual si Samson ilabi na nga kapin sa 100 ka gramos ang nasakmit gikan kaniya.
Dugang ni Macatangay, ang mga operatiba naniid kang Samson sud sa kapin sa usa ka semana ug dihang nakompirmar ang iyang illegal nga negusyo, ilang gilusad ang buy-bust.
Gawas sa Guadalupe, ang mga silingang barangay mao usab ang giingong gisuplayan og shabu ni Samson.