Ang mga lumolupyo sa Dakbayan sa Lapu-Lapu nanghangyo sa Office of the Ombudsman-Visayas nga manginlabot labot sa pag-apod-apod sa hinabang pinansyal sa mga indibidwal nga naapektuhan sa bagyong Odette.
Ang Request for Assistance Letter nadawat sa Ombudsman Martes, Enero 18, 2022, nga naghangyo kang Mayor Junard “Ahong” Chan, pinaagi sa City Treasurer, City Budget Officer, ug City Accountant sa paghatag og impormasyon sa kahimtang sa pinansyal nga tabang.
Subay sa suwat, ang mga reklamante pulos mga residente sa managlahing barangay sa dakbayan, mainland ug taga Isla sa Olanggo ug pulos mga biktima sa bagyo.
Ang sulat nidugang nga ang mga reklamante nagpuyo na karon sa mga balay nga wala nay bungbong ug literal nga walay atop sa ilang mga ulo.
“Undoubtedly, there is apparent resistance and lack of transparency on the part of the Administration of Mayor Chan to account to the public as to how much amount the city government had received for Typhoon Odette victims,” matod sa tipik sa suwat.
Si Chan, sa iyang habig, nitug-an sa SunStar Cebu niadtong Martes, Enero 18, nga wala siya makadawat og kopya sa reklamo gikan sa Office of the Ombudsman.
Hinuon matud pa ni Chan nga pamulitika ang tumong niini ug andam siyang moatubang sa bisan unsang reklamo nga ipasaka batok kaniya.
“Andam ko mo atubang. Ingna sila, bisag asa mi mag abot,” matod ni Chan.
Ang Siyudad nanginahanglan og P419 milyones aron mahatagan ang tanang 83,941 ka mga apektadong indibidwal nga giila nga benepisyaryo sa P5,000 nga tabang pinansyal.
Hinuon, P236 milyones ra ang magamit nga pundo gikan sa panudlanan sa dakbayan.
Una nang namahayag ang mayor nga personal niyang pangitaon ang kuwang nga kantidad aron ang tanan makadawat sa cash aid.
Matud pa ni Chan nga gikuwestiyon sa oposisyon kon asa niya makuha ang nahabiling P183 milyones.
“Diin kog kwarta? Ayaw mo og pangutana kung hain kog kwarta. Inig human anig hatag nako, subayan ta mo,” matod ni Chan.