Dili mosupak si Mayor Michael Rama sa Department of Transportation (DOTr) kon ipatuman niini ang no vaccination, no ride policy sa Visayas partikular sa Cebu City.
Apan si Rama nagkanayon nga sa pagkakaron samtang wala pa ang kamanduan sa national government, padayon nga makasakay sa mga public utility vehicle (PUV) ug ubang matang sa transportasyon ang mga walay bakuna.
Ang mayor nagkanayon nga ang maong polisiya didto ra gipatuman sa National Capital Region (NCR) ug dili siya mopatuman niini dinhi sa Cebu City kon walay mando sa national government.
“I have not been into that, so I do not wish to have that. If DOTr, LTFRB and LTO will go into it, if it is a national policy, wwe don’t have also to argue,” matod ni Rama.
Ang mayor padayon nga nidasig sa mga Sugbuanon sa pagpabakuna aron ma-protektahan batok sa Covid-19 labi na nga karon dul-an na sa 4,000 ang aktibong mga kaso sa dakbayan sa Sugbo.
Sa Cebu City Government, si Rama maoy nipatuman sa no vaccine ,no bonus para sa libuan ka mga empleyado ug sa mga senior citizen ug persons with disability.
Iya usab nga giuna og hatag ang financial assistance sa mga fully vaccinated.
Si Rama nidasig sa mga tawo nga kadtong wala pa magpabakuna sa pag-adto sa mga vaccination sites nga nahimutang sa mga mall, City Hall ug sa ilang mga pop-up vaccination site para mabakunahan ug mapanalipdan gikan sa kamangtas sa Covid-19.