Kapin kun kuwang 300 ka mga drayber sa public utility vehicle (PUV) ang nasikop tungod sa overloading sa mga pasahero sa dakbayan sa unang tunga sa buwan sa Enero 2022.
Mao kini ang gibutyag ni Edwin Jumao-as, executive director sa Traffic Enforcement Agency of Mandaue (Team), human sa ilang esrikto nga pagpatuman sa 70 percent passenger capacity sa PUVs nga nagbiyahian sa dakbayan.
Si Jumao-as nagkanayon nga pinaagi sa ilang random checkpoints uban sa pag-abag sa Mandaue City Police Office (MCPO), nakadakop sila og 15 ngadto sa 20 ka drayber sa PUV matag adlaw sukad sa Enero 1.
Ang executive director nagkanayon nga mayoriya sa nasikop giisyuhan og citation tickets mao ang mga drayber sa traditional jeepney.
Gitumbok nga usa sa mga hinungdan sa pagsaka sa mga kaso sa Covid-19 sa dakbayan, lakip sa silingang mga dakbayan sa Sugbo ug Lapu-Lapu, mao ang panagdasok sa mga pasahero.
Matod ni Jumao-as, ilang prayoridad ang pagpatuman sa health protocols, labi na sa social distancing sulod sa PUVs.
WA MOSUBAY
Samtang, si Jumao-as nipaambit nga dunay lima ka drayber nga nasakpang wala mosunod sa ilang rota.
“Makoan sila sa daghan og pasahero, maoy makaaghat nila nga nindot ngadtong rotaha kay daghang pasahero,” matod ni Jumao-as kon nganong wa mosunod ang drayber sa ilang rota.
Gawas niini, si Jumao-as nagkanayon nga dunay na-impound nga daghang mga motorsiklo sulod sa samang panahon, tungod kay walay lisensiya sa pagmaneho ug rehistrasyon.
Apan wala siya mohatag og gidaghanon sa mga motorsiklo nga na-impound.
Dugang sa Team executive director, ang drayber nga masakpan nga nag-overloading og pasahero, cutting trips, ug walay rehistrasyon multahan og P1,000.