Garganera: Occupancy rate sa Covid beds sa public hospitals ‘high risk’ na

High risk na ang occupancy rate sa mga public hospital alang sa Covid patients samtang normal pa ang utilization rate sa mga pribadong ospital sa dakbayan sa Sugbo, base sa update sa Miyerkules, Enero 19e.

Si Konsehal Joel Garganera, deputy chief implementer sa Emergency Operations Center (EOC), nagkanayon nga niabot na og 80.87% ang okupado sa public hospitals ug 41.67% sa private hospitals.

Sa kinatibuk-an, 5 ka ospital sa dakbayan dunay 61.13 percent critical utilization rate nga gihulagway ni Garganera nga moderate risk.

Ang upat ka public hospitals adunay kapin o kulang 410 beds ug 800 beds ang gitagana sa 11 ka private hospitals sa dakbayan sa Sugbo.

Kini human ang dakbayan naka-record og laing 660 ka mga bag-ong napositibo sa virus gikan sa 1,540 ka mga indibiduwal nga gi-swab kun 42.86% daily positivity rate (DPR) niadtong Enero 18.

Sa listahan sa EOC, sa 660 nga nagpositibo, 20 ang nag-edad og zero ngadto sa 10 anyos, lima ang 91 ngadto sa 100 anyos.

Sa kinatibuk-an, ang dakbayan adunay 3,822 ka aktibong kaso samtang 73 sa 80 ka mga barangay sa siyudad ang aduna nay kaso sa Covid-19.

Nag-una niini ang mga barangay sa Guadalupe, 358; Lahug, 226; Apas, 193; Capitol Site, 150; Tisa, 143; Mabolo, 142; Talamban, 129; Camputhaw, 128; Labangon, 126; Sambag-2, 107; ug Punta Princesa, 102.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph