Dili na makasulod ang mga menor de edad ug mga hamtong nga walay bakuna batok sa coronavirus disease 2019 (Covid-19) sa mga mall ug mga sirado nga establisemento sa dakbayan sa Sugbo sugod kagahapon, Enero 19, 2022.

Kini subay sa Executive Order (EO) No. 157 nga giulohan og Oplan “Puyo Gihapon” nga giisyu ni Mayor Michael Rama isip usa sa mga lakang aron mapugngan ang aktibidad sa mga tawo gumikan sa kalit nga pagsulbong sa aktibong mga kaso sa coronavirus nga niabot og 3,822 sulod sa 18 ka alaw.

Ang mga bata nga 11-anyos paubos dili na makasulod sa nahisgutang mga establisemento samtang ang 12 ngadto sa 17 anyos makasulod sa mall apan kinahanglan adunay kuyog nga hamtong ug kinahanglan nga bakunado sanglit gihingusgan sa EO 157 ang pagpuyo sa balay.

Ang buot mosulod sa nahisgutang mga establisemento kinahanglan nga mopakita sa ilang vaccination card.

Gipatas-an usab ang curfew nga karon magsugod sa alas 11 sa gabii hangtod alas 4:00 sa kaadlawon sa pagka sunod adlaw para sa mga hamtong samtang ang menor magsugod alas 10:00 sa gabii.

Ang Cebu City nipatuman na usab sa home care, isolation ug monitoring ubos sa Section 7 sa EO 157 aron kadtong mga asymptomatic ug mild symptoms sa Covid-19 adto ra magpaalim sa ilang balatian sulod sa ilang mga pinuy-anan.

Sa pagnihit sa influenza medicines, ang Task Force Puyo, nga nalatid sa Section 10 , maoy mo-monitor aron maseguro nga walay mahitabo nga pagpanago sa mga tambal ug ubang essential goods nga maoy gikinahanglan niining panahon sa pandemya.

“In the observance of the Alert Level 3 guidelines, the Task Force “Puyo”, headed by the City Chief of Police, must strictly enforce the provisions of this executive order.." tipik sa EO 157.

Ilawom sa bag-ong EO ni Rama, gimanduan ang public ug private hospitals nga ang ilang dawaton nga pasyente kadtong gikonsiderar nga critical o severe ang kondisyon.

Ang dunay mild symptoms dili ipa-admit aron dili mapuno ang mga ospital sa pasyente sa Covid-19, sumala sa Section 13 sa EO.

Hugot usab ipatuman ang 30% indoor capacity ug 50% outdoor capacity sa mga business establishment ug ang gitugotan nga makasulod ug makapahimulos sa serbisyo mga bakunado lang subay sa guidelines sa Inter Agency Task Force.

Niining kalit nga pagsulbong sa kaso sa Cebu City, istrikto usab nga ipatuman ang 70% nga capacity sa tanang matang sa transportasyon aron dili magdasok ang mga sumasakay nga maoy posibleng tinubdan sa tinakdanay.

Padayon usab ang pagdasig ni Rama sa mga tawo nga wala pa nakapabakuna sa pagpabakuna na sanglit libre ug aduna pay premyo nga house and lot, brand new car ug linibo nga gift certificate ug daghang appliances sa raffles.

Sa kinatibuk-an, niabot na og 540,136 ang fully vaccinated ug 655,244 ang nakadawat na sa ilang first dose ug naghuwat sa ilang second dose gikan sa 1,025,456 sa mga tawo nga nagpalista sa programa sa pagmakuna sa kagamhanan sa dakbayan.