Nimando na si Cebu City Mayor Michael Rama sa tanang mga establisemento ug malls nga di na pasudlon ang mga way bakuna. Apan sa mga kan-anan nga dunay al fresco kun naa sa gawas nga pwesto, mamahimo ra silang makakaon o makapangape ug makainom.
Bisan tuod kon gitan-aw kini nga discriminatory, matod sa mayor nga kinahanglan usab nga panalipdan ang katungod sa mga bakunado nga nanalipod sa ilang panglawas batok sa coronavirus disease 2019 (Covid-19).
Niadto pa unta kini nga Enero 1 moepekto, apan nasanta sa bagyong Odette kay daghan ang mga apektado. Niadtong mga adlawa, daghan pang mga serbisyo ang nangaputol, nagnihit ang tubig ug pipila lang ka mga establisemento ang bukas.
Daghan ang nakasaway ani nga polisiya tungod kay alang sa mga supak, kini discriminatory, labina niadtong gusto unta nga magpabakuna, apan di makahimo tungod kay duna silay medical nga kahimtang. Magbutang kini kanila sa kakuyaw, inay alang sa ilang kaayuhan.
Gawas niini, klaro baya sa balaud alang sa Covid-19 nga di mapugos ang mga tawo sa pagpabakuna. Sa ato pa, way polisiya unta nga di molapas niini. Apan duna nay mga kamandoan ang kagamhanan nga nagpugos sa publiko sa pagpabakuna sama sa pagpailawom sa RT-PCR test makaduha sa us aka buwan alang sa mga di bakunado. Lipatlipat nga polisiya.
Inay pig-utan ang mga di bakunado, hatagan og mas maayo, daghang insentibo ang mga nagpabakuna. Hugtan usab og maayo ang pagpatuman sa mga health protocol ug silutan ang mga makalapas.
Bisan gud kon bakunado ka, matakdan ra man gihapon og Covid-19 base sa dagan sa sitwasyon sa nasod ug ubang mga dapit sa kalibutan. Sama sa di bakunado, makapanakod gihapon sila.
Ang hugot nga pagpatuman sa mga protocol mas epektibo pa kay sa pugngan ang di mga bakunado sa pagsulod sa establisemento, pagsakay sa publikong sakyanan ug uban pa.