NAKADEPARAL na ang Davao Region sa unang lima ka mga kaso sa Covid-19 nga Omicron variant. Kini ang gipahibawo sa Department of Health Davao Region (DOH-Davao) kagahapon, Huwebes, Enero 20.
Sa suwat-pamahayag nga gipagawas sa online, gikompirma sa DOH-Davao nga tulo sa lima ka kaso mga returning overseas Filipinos (ROF), samtang ang duha mga local transmissions kay wa silay kasaysayan nga nakabiyahe sa gawas sa nasud.
"The Department of Health-Davao Center for Health Development confirms the detection of three Omicron (B.1.1.529) variant of concern from the 35 specimens sent last December 23 and 29, 2022 to the University of the Philippines-Philippine Genome Center (UP-PGC) and two more who were tested in other regions," base sa ilang pahayag.
Hinuon, ang lima nga nakompirmang mga kaso sa Omicron sa Davao Region giingong nakarekober na sa dihang napagawas ang taho sa whole genome sequencing.
Ang unang kaso mao ang 23-anyos nga lalaking ROF. Na-swab siya sa Philippine Red Cross Clark Molecular Laboratory ug ang sample nakolekta niadtong Disyembre 18, 2021. Kasamtangan siya karon naa sa iyang panimalay sa Davao del Sur.
Ang ikaduhang kaso mao ang 27-anyos nga babaye ug molupyo sa Davao City kinsa niabot gikan sa Singapore niadtong Disyembre 18, 2021. Iyang sample nakolekta niadtong Disyembre 21 sa miaging tuig ug naproseso sa Southern Philippines Medical Center (SPMC). Giingong nakarekober na siya sukad pa niadtong Enero 2, 2022.
Ang ikatulo nga kaso mao ang 44-anyos nga lalaking ROF gikan sa United Kingdom kinsa niabot niadtong Disyembre 22 sa miaging tuig. Gitaho nga fully vaccinated na ug molupyo sa Davao del Norte. Nakompleto niya ang iyang 14-adlaw nga isolation sa Manila una mibiyahe padulong dinhi sa Davao Region. Ang iyang sample nakolekta niadtong Disyembre 26, 2021.
Ang ikaupat nga kaso mao ang 28-anyos nga fully vaccinated nga babaye ug molupyo sa Davao Occidental nga way kasaysayan sa pagbiyahe sa gawas sa nasud. Na-swab siya sa RT-PCR testing niadtong Disyembre 11, 2021.
Katapusan, ang ikalima nga kaso mao ang 63-anyos nga lalaki kinsa fully vaccinated na ug molupyo sa Davao Occidental nga way kasaysayan nga nakalaag sa gawas sa nasud. Na-swab siya sa RT-PCR testing niadtong Disyembre 16, 2021.
Tungod niini, gikanayon sa DOH-Davao nga gipakusgan pa ang bio-surveillance sa rehiyon ug ang ahensiya magpalapad pa sa ilang kapasidad nga modeparal og uban pang mga variants sa rehiyon.
Ang ahensiya molusad sab og "intensive case investigation" uban ang mga nagpakabanang local government units aron nga maseguro nga ang nataptan nga mga indibiduwal ug uban pang close contacts motuman sa gitakda nga isolation period.
"For the respective LGUs of the non-OFW cases, they are currently back tracing to determine their exposures and travel histories," matud pa sa DOH-Davao.
Dugang sa DOH-Davao nga ang pinakauwahing katikaran, duna nay kinatibuk-ang 4,564 specimen samples gikan sa Davao Region gipadala ngadto sa University of the Philippines-Philippine Genome Center alang sa whole genome sequencing testing.