Natupngan ni All-Star center Joel Embiid ang iyang career high nga 50 puntos sulod lang sa 27 ka mga minutos nga pagduwa aron agakon ang hosts Philadelphia 76ers ngadto sa dakong kadaugan batok sa Orlando Magic, 123-110, kagahapon, Enero 20, 2022 (RP time) sa National Basketball Association (NBA).
Nagkanayon si Embiid nga nahimo kining posible gumikan sa suporta sa iyang mga kauban.
“My teammates just found me. And I did the rest,” asoy ni Embiid, kinsa usa sa lig-ong mga kandidato alang sa inilugay sa MVP award.
Ang 76ers, nga ningsaka sa ikalimang dapit sa Eastern Conference dala ang 26-18 nga rekord, nakadawat sab og 21 puntos gikan kang Tobias Harris.
Ang Magic, nga nakatilaw sa ilang ika-13 nga pilde sa katapusan nilang 14 ka mga duwa, naunlod og samot sa labing ilawom nga puwesto sa East dala ang 8-38 nga rekord.
Gipangulohan ni Mo Bamba ang Magic pinaagi sa iyang 32 puntos lakip na niini ang pito ka three-pointers.
Human sila gi-boo sa kaugalingon nilang mga dumadapig tungod sa ilang pagkalubong sa halftime, 47-57, batok sa makonsiderar nga labing huyang nga puwersa sa liga, ang 76ers nagbangis na’g maayo pagsugod sa 3rd quarter sa pagpangulo ni Embiid.
Sunodsunod nga dagkong mga rally ang gimugna sa 76ers aron makmakon ang Magic.
Grabe kabangis ang gipakitang duwa ni Embiid sa 3rd quarter nga maoy kalit nga nagpabangon sa 76ers ug ning higayuna, nilanog na ang abiba nga “M-V-P” alang kaniya. Sa 3rd quarter, 23 ka mga puntos ang nahimo ni Embiid.
“I played with [Basketball Hall of Famer] Dominique [Wilkins], and I don’t know if I’ve seen that. I’ve seen Dominique score more, but it took the whole game,” batbat ni 76ers coach Doc Rivers kabahin sa duwa ni Embiid sa 3rd quarter.
“That was easy, quick, efficient and determined.” (AP)