Gipabuhagay daan ni World Boxing Council (WBC) featherweight champion American Gary Russell Jr. nga dili 100 percent ang iyang kondisyon inig depensa niya sa iyang korona batok kang Filipino Mark Magsayo karong Enero 23, 2022 (RP time) sa Borgata Hotel Casino sa Atlantic City, USA.

Hinuon gitataw ni Russell nga wala siya mabalaka gumikan kay anad na siya niining maong sitwasyon.

Gibutyag niya nga adunay siya’y angol, hinuon dili ra kini grabe.

“I never go into any of my fights 100 percent, to be honest with you. I do have a little slight injury but I prefer not to elaborate on it until after the fight,” matod ni Russell sa interbyu sa DAZN nga napatik sa www.boxingscene.com.

Nidugang si Russell nga nag-training lang siya sa iyang kaugalingon gumikan kay ang iyang amahan ug sa samang higayon iyang trainer bag-uhay lang giputlan og tiil tungod sa komplikasyon sa diabetes.

Si Russell, kinsa adunay 31-1, 18KOs nga rekord, katapusang nakapakita ofg aksyon niadtong Pebrero, 2020 diin midaog siya pinaagi sa unanimous decision batok kang Tugstsogt Nyambayar.

Gikan niadtong 2015, kausa ra moaway si Russell sa usa ka tuig.

Apan taliwala ning tanan niyang gipangbutyag, dako gihapon ang pagsalig ni Russel nga molampos batok kang Magsayo.

“We’re going to get through this fight, we’re still going to make things shake and then we’ll go ahead and put it out there after it’s all said and done,” dugang ni Russell.