Posibleng mosanga ang Korean wave sa Philippine sports gumikan kay kasamtangang nakigsabot ang Philippine Basketball Association (PBA) sa Korean Basketball League (KBL) alang sa usa ka programa.
Nagkanayon si PBA commissioner Willie Marcial nga ningkablit ang KBL sa PBA aron pahugtan ang panaghigalaay sa duha ka mga liga.
“Sinulatan tayo ng presidente ng KBL, binabati tayo niya na natapos natin ‘yung liga natin, successful. Gusto niya ng cooperation and strengthening relationship, friendship ang sinabi niya doon,” asoy ni Marcial nga napatik sa www.gmanews.tv.
Nagkanayon si Marcial nga gusto ni KBL president Kim Hee-ok nga magtambayayong ang PBA ug KBL alang sa programa diin puwedeng magbinayloay og mga magduduwa ang duha ka mga liga.
Nakauyon sab si Marcial ning maong ideya apan iyang gitino nga kinahanglan pa tun-an ang pagpatuman niini.
“Gusto niya, mag-usap ang PBA at KBL kung papaano magpalitan ng players, kung anong puwede. Maganda ‘yun,” dugang ni Marcial.
Gipasabot ni Marcial nga iyaha na kining gipadangat sa PBA Board of Governors ug gihatagan dayon siya og pagtugot ni league chairman Ricky Vargas nga makigsabot sa KBL.