Mitumaw na sab kining no election (no-el) nga gipalakaw sa ubang mga tawo. Ambut og unsay ilang tumong ug tuyo apan daghan nang nagpinustaanay kalabot niini. Ang labing dakung katarungan nga ilang gituhoan mao ang kalabut sa kaso ni kanhi senador Ferdinand “Bongbong” Marcos, Jr. nga anaa karon sa Second ug First Division sa Commission on Elections (Comelec). Gibasura na sa Second Division ang kaso sa pagpakanselar unta sa certificate of candidacy (COC) ni Marcos apan mopasaka og motion for reconsideration ang mga petitioner. Gipaabut pa ang desisyon sa First Division nga buot ipa-disqualify si Marcos.

Sumala sa nagpadagan niining maong estorya nga bisan unsay mahimong final decision kalabut sa maong mga kaso mahitabo ang kaguliyang nga mao na kuno unya ang basihan ni Presidente Rodrigo Duterte sa pag-deklarar og martial law ug pagkanselar sa eleksiyon. Murag buot ipasabut niining maong mga tawo nga katarungan kini ni Presidente Duterte aron makapadayon siya paglingkod sa Malacanang. Dili ako motuo nga buhaton kini ni Duterte kay nasayud siya nga dili sayon ang pagdeklarar og martial law karong panahuna.

Ang Presidente maka-deklarar og martial law kon dunay invasion or rebellion ug kon ang public safety nagkinahanglan niini. Apan karon kinahanglang dili kini molapas og 60 ka adlaw apan mahimo siya nga makapangayo og extension. Kinahanglan usab nga mohimo siyag report ngadto sa Kongreso 48 oras human siya moproklamar sa martial law. Dili na kini pareho sa panahon ni anhing Presidente Marcos nga siya ray nagbuot kon kanus-a niya gi-undang ang martial law.

Kining paglugway sa termino sa usa ka pulitiko nga supak sa konstitusyon dili madawat sa mga Pilipino ingon man sa mga nasud nga demokrasya nga sakop sa United Nations.

* * *

Kinahanglang tubagon sa kadagkuan sa gobiyerno kining mga pangutana ug baruganan ni Dr. Persida V. Rueda Acosta, D.S.D. (Doctor of Social Development). Usa siya ka 4th placer sa 1989 bar ug maoy Chief Public Attorney sa Public Attorney’s Office (PAO). Karong bag-o, hugot niyang gisupak kining mga pagdili sa mga tawo nga dili bakunado. Iyang gibarugan nga kining maong mga kasugoan nakasupak sa batakang balaud. Sumala niya nga dili mapugos ang usa ka tawo nga magpabakuna. Dili usab mahimong pugngan ang kalihukan sa usa ka tawo, dugang niya. Iyang giangkon nga wala pa siya magpabakuna kay naghuwat siya og maayong klase sa bakuna, dili kining gipanggamit sa pagkakaron. Dalaygon kining baruganan ni Atty. Acosta dili tungod kay supak siya sa bakuna, apan ang iyang pagbarug sa iyang gituhoan nga iligal mga kasugoan sa Presidente. Atong tan-awon og unsay ilang buhaton sa PAO chief. (mannyrabacal1144@gmail.com)