Gitakbuyan og Covid 19 si kanhi Cebu City Mayor Tomas Osmena. Kini ang gi-angkon niya mismo sa iyang FB account sa miaging adlaw. Naka-isolate na siya karon. Dili lalim nang takbuyan kag balatian. Ako mismo nahospital niadtong miaging buwan. Dili hinuon Covid 19 tong ako hypertension ra. Maayo gani kay di tanto grabe. Atong i-ampo si Mayor Tom ug uban pang mga nasakit nga maayo dayon sila ilang gihambin nga balatian.

NGANONG MISAKA?

Misaka ang mga kaso karon sa Covid 19 dinhi sa dakbayan sa Sugbo. Mao kini ang rason kon nganong gipa-ubos ang Sugbo ug dakbayan sa Mandaue sa Alert Level 3. Unsa man kaha ang hinungdan niini? Gumikan ba sa Omicron variant nga dalin kaayong manakod ug mokatap? O gumikan ba sa atong sobrang kompiyansa sa miaging mga adlaw sama niadtong panahon sa Pasko ug Sinulog?

Kay bisan tuod og walay dakong kalihukan sa Sinulog sama sa grand parade, diha man gihapoy mga kalihukan nga nakapatapok sa katawhan. Wala man gi-istrikto ang mga kalihukan sa Basilica Minore Del Santo Nino alang sa mga manimbahay. Karon gani bisan og naa sa Alert Level 3 wala giestrikto ang mga kalihukan. Obserbahi ninyo ang atong kahimtang.

Kining atong mga opisyal nagsigeg ingon kaniadto nga dili mokompiyansa apan sila ra usab ang mitugot nga mohimo og kalihukan nga mopakita og kompiyansa. Kon si Cebu City Mayor Mike Rama lang ang pabut-on, gusto na siyag mag-Sinulog ta. Kon wala pa ta maigo og bagyo, duna tay daghang mga kalihukan sa Sinulog. Kay mopatigbabaw ang atong tinuhuan ug tradisyon bisan naay pandemiya.

Karon tan-awa og unsay nahitabo?

Kon nagka-problema ang ubang kanasuran nga mas advanced ug adunahan pa kay kanato unsaon pag-control sa Covid 19, mas naglabad usab ang ulo sa atong mga opisyal. Ang atong mga opisyal nagkalain-lain og polisiya ug pamaagi hinungdan nga dili kaayo epektibo ang ilang mga lakang pagpakgang sa pagkuyanap sa virus. Unya ang virus nag-level up pod. Sa madugay ug madali, kining bakuna malabwan na sa virus. Modiskobre na usab ang scientists og bag-ong epektibong vaccines. Magbalik-balik ta niini sa sinugdanan ug magbinasulay. (bobbygnalzaro@gmail.com)