Sa Huwebes sa kaadlawon, Enero 19, 2022, gipusil sa usa ka 14 anyos ang 15 anyos nga lalake dihang naglinabayay ang duha ka mga grupo. Maayo gani kay sa buko-buko ra naigo ang menor.
Apan nahibulong ang mga opisyal sa Cebu City Police Office (CCPO) kon nganong duna pay mga menor nga nakagawas nga unta kaadlawon na. Gipatuman sa Siyudad ang curfew sa mga menor sugod pa gani sa alas 10 sa gabii.
Klaro kini nga palpak sa deployment sa kapulisan. Apan pulis ra ba gyud han-ukan sa tanan? Unsa diay gibuhat sa mga barangay?
Gimbuhaton sa barangay ang pagpatuman sa mga ordinansa ug balaud isip nag-unang institusyon sa kagamhanan sulod sa ilang hurisdiksyon. Makapanday gani og ordinansa ang matag barangay alang sa mga dapit ubos sa lang hurisdiksyon basta di lang molapas sa lokal nga mga ordinansa ug nasudnong balaud. Ingon niana ang gahom sa barangay officials.
Kon nagbuhat pa unta sa ilang tahas ug responsibilidad ang barangay, kaning mga batan-ong menor di na makagawas lapas sa oras sa curfew. Apan kay kadaghanan mangatulog ug magmika na lang sa ilang tagsa ka buhatan kay lawom nang gabii, nga mao say pagduwa sa badlungon nga mga menor.
Hayan nahadlok sa pagpatuman sa ordinansa ang mga opisyal kay wa baya silay armas ug uban pang ikapanalipod sa kaugalingon. Dinhi na mahimong mosulod ang kapulisan.
Sama sa gibuhat sa nangagi, mahimong butangan og labing minos usa ka pulis ang matag barangay nga mo-roving uban sa mga tanod matag gabii. Ning paagiha, magpanagana na ang mga badlungon sa way puas nga pagsupak sa balaud.
Lahi sa nangaging pagpatuman sa mga ordinansa sa Dakbayan sa Sugbo, bisan lapas na sa curfew hours, daghan pang nagsuroysuroy karon sa kadalanan, nag-inom sa mga bar. Basin gigaanan sa silot?
Angay nang magtambayayong ang barangay ug kapulisan aron mapatuman sa hingpit ang mga ordinansa sa dakbayan.