Kapin sa usa ka kilo nga shabu nga mobalor og P7.1 milyunes nasakmit gikan sa duha ka mga lalake sa buy-bust sa kapulisan sa dalan Kamagong, Barangay Lahug, siyudad sa Sugbo, pasado alas 10 sa gabii, sa Miyerkules, Enero 19.

Ang mga nadakpan mao sila si Khent Basarte, alyas Mikmik, 23, ug Rellou Suquib Donaire, alyas Rell, 33, ug pulos taga Sityo Sugarlandia, Barangay Bacayan, Siyudad sa Sugbo.

Si Police Major Jonathan Taneo, pangulo sa City Drug Enforcement Unit (CDEU) sa Cebu City Police Office (CCPO) uban sa iyang mga operatiba, maoy nihimo sa anti-drug operations.

Matod ni Taneo nga motimbang og 1,055 gramos o kapin sa usa ka kilo ang nasakmit sa gituohang shabu gikan kanila ni Basarte ug Donaire.

Kini nibalor og P7.1 milyunes base sa street drug value.

Dugang ni Taneo nga gitug-an sa duha nga ang tinubdan sa shabu anaa na napriso sa Cebu City Jail, apan dili lang una ibutyag sa kapulisan ang ngan kay duna pay giplano nga mosonud nga ronda.

Si Police Colonel Ernesto Salvador Tagle, direktor sa CCPO, nisusi sa lugar kon asa gihimo ang buy-bust ug nidayeg sa kalampusan sa iyang mga sakop.

Sukad siya niasumer pagka hepe sa CCPO, mao kini ang labing unang dako nga nakuha ug labing dako sa unang mga adlaw sa 2022.

Matod ni Tagle, ang kampanya sa ilegal nga drugas sa dakbayan magpadayon sa iyang pamunoan.

Nipasidaan siya sa mga nalambigit sa pagpamaligya og drugas nga moundang na kay dili pa ulahi ang tanan.

Gihulagway usab sa CCPO nga ang mga dinakpan makonsiderar nga regional high value target sa PNP tungod sa drugas nga nakuha.