Nangabot na sa dakbayan sa Sugbo ang gihatag nga augmentation sa Police Regional Office 7 alang sa Cebu City Police Office nga maoy tahasan sa estriktong pagpatuman sa mga lagda nga giluwatan ni Cebu City Mayor Michael Rama.
Ang maong mga personnel moabot og 150, katunga sa gi request sa mayor ngadto ni PNP Chief Police General Dionardo Carlos, pangu sa PRO.
Matod ni Police Lieutenant Colonel Wilbert Parilla, deputy city director for operations sa CCPO, nga ipaubos una sila sa briefing una ipang apud-apod sa 11 ka police stations.
Gawas sa pagpatuman sa Oplan Bulabog ug Oplan Puyo sa Kagamhanan sa Siyudad sa Sugbo, sila usab ang tahasan nga mobantay sa bar exams karong Pebrero.
Sa data nga gipahibawo sa Department of Health DOH 7, nakatala ang dakbayan sa Sugbo og kapin sa 700 ka kaso sa Covid 19 sa usa lang ka adlaw nga gihulagway sa kapulisan nga labing taas nga kaso.
Aron moubos ang mga kaso sa Covid-19, kinahanglan nga balikon nila ang ilang gihimo sa milabay nga tuig diin estrikto sila sa pagpatuman sa tanang minimum health standard.
“What we have done in the previous surge nato last August sa Delta variant... pag maayo mga executive order and other health related protocols, dali nga mapaubos ang atong kaso,” matod ni Parilla.
Gi-monitor na sa kapulisan ang mga mall kon mituman ba sila sa lagda nga giluwatan ni Rama nga no vaccination card, no entry policy.
Matod ni Parilla nga personal siya nga miadto sa usa ka mall sa siyudad ug iyang nakita nga gituman sa mga security personnel ang lagda sa Oplan Puyo.