Ang Cebu City Government mopalit og tambal alang sa sip-on, ubo, hilanat ug ubang gipamati sa lawas niining panahon sa pandemya ug pagnihit sa suplay taliwa sa pagsulbong sa mga kaso sa coronavirus disease 2019 (Covid-19).
Hinuon, alang ra kini sa mga kabos.
Si Atty. Gerry Carillo, chairman sa Cebu City Disaster Risk Reduction ang Management Council (CCDRRMC), nagkanayon nga nag-proposed sila og P50 milyunes aron maoy ipalit og tambal.
“Ni-decide si Mayor Michael Rama nga mag-allocate og pundo to provide the 40,000 low income families nga tagaan nato og libre nga tambal as a pre-emptive method,” matod ni Carillo.
Matod sa kanhi konsehal sa south district nga si Carillo nga adto kuhaon ang pundo sa quick response fund ilawom sa Cebu City Disaster Risk Reduction and Management Office (CCDRRMO) nga karon gipangulohan na ni retired Bureau of Fire Protection general Aderson Comar.
Ang chairman sa CCDRRMC nga maoy gisaligan ni Rama nagkanayon nga aduna silay session karon, Enero 21, aron aprobahan ang resolution nga maoy mag-appropriate sa P50 milyunes aron makapalit na og vitamins ug influenza medicines.
“Ang mga kabos atong tagaan og paracetamol, analgesic , Lagundi, multi vitamins, vitamin-C para dunay proteksyon bahin sa onslaught karon sa Omicron variant sa Covid-19 and other Covid related diseases,” pasabot ni Carillo.
Iyang giasoy nga ang Cebu City direkta nga mopalit ngadto sa manufacturers diin ang presyo anaa ra sa tag P3 itandi sa giingong tag P7 ngadto sa P10 sa matag tambal.
Si Carillo nisubay nga base sa pamahayag sa asosasyon sa mga pharmacy, dunay igong supply sa mga tambal apan lahi ang sitwasyon sa pagpamalit sa mga tawo kay wala nay baligya sa mga botika.
Ang kahimtang padayon nga gipanid-an sa CCDRRMC ug aduna na silay mga personnel nga naniid kon wala bay nahitabo nga hoarding sa mga tambal aron makamugna og artificial shortage.
Ang maong kahimtang dili lang sa dakbayan sa Sugbo apan sa tibuok nasod.