Kon sumadahon ang gibana-bana nga danyos nga namugna sa Bagyong Odette sa mga negosyo nga naapektuhan sa katalagman sa Northern Point Beach, nahimutang sa Jubay, Lungsod sa Liloan, Sugbo, moabot sa kapin sa P4 milyones.
Kini maoy gitug-an ni Marc Cuizon, negosyante ug tag-iya sa Makan chain of restaurants kinsa mihulagway nga wa na mahitsura ang maong dapit human gikuso-kuso ni Odette kapin na sa usa ka buwan ang milabay.
Ingon sa nahapay ang linyada sa mga food stall sa Northern Point Beach nga kanhi tapuk-an sa mga tawo nga gustong mag-chill chill.
MOBANGON
Taliwala sa maong pagsuway, si Cuizon wa mawad-i og paglaom ug mipasalig nga mobangon sila gikan sa ilang pagkahagba.
Sakit man tuod sa buot sa mga negusyante nga mi-abang og stall sa Northern Point Beach human gibalibag ug giguba sa bagyo ang ilang mga hinagoan nga kabtangan, apan wa kini magpasabot nga moundang sila.
“NP (North Point) will rise again 02-02-2022,” tubag ni Cuizon sa messenger sa pangutana sa Superbalita Cebu nga nagpasabot nga si Pebrero 2, 2022 mobukas pagbalik ang Northern Point Beach.
Pipila ka adlaw human sa maong katalagman, nagtanyag si Cuizon og libreng charge sa mga gadgets ug chargeable lights.
Ang naka-ayo kay libreng snacks ang iyang gihatag sa mga tawo samtang nagpaabot nga mopuno ang ilang gipa-charge.
Dugang pa ni Cuizon nga di niya igsapayan ang nahitabo kay ang labing importante nga buhi, nga usa sa iyang gipasalamat sa Langitnong Amahan.
Dia ang pipila sa mga hulagway kaniadto ug human sa paglampurnas ni Odette sa Northern Point Beach. (Hulagway gikan sa Facebook ni Marc Cuizon)