"Dunay matumba or ma-knockout ning awaya."
Kini maoy gibatbat nga panglantaw sa kanhi chief trainer ni Mark Magsayo nga si Edito Villamor kalabot sa world title fight sa iyang kanhi batos batok ni American Gary Russell Jr.
Si Magsayo mosuway pag-ilog sa World Boxing Council (WBC) featherweight title ni RusselL karong Enero 23 (RP time) sa Borgata Hotel Casino, Atlantic City sa New Jersey.
"Every boxer nga moduwa og world championship naa gyuy dakog chance nga modaug kay gipreparahan gyud na nila pag-ayo," matod ni Villamor, kanhi two-time world title challenger.
Dako ang pagtuo sa kanhi headcoach sa ALA Boxing Gym -- diin nagsugod si Magsayo sa iyang boxing career – nga dili moabot og final round ang maong panagsangka.
Hinuon wa siya motagna kon kinsa ang ma-knockout sa duha sanglit alang kaniya pulos aduna kini kapabilidad nga motumba sa matag usa.
"Dili na moabot og final round naa gyud matumba or ma-knockout ana nila either si Russell or Magsayo kay naa man puros abilidad," matod ni Villamor kinsa nanag-iya na karon og kaugalingong gym nga mao ang Villamor Brothers gym sa dakbayan sa Mandaue.
Si international boxing judge Edward Ligas, sa iyang bahin, aduna usay susamang pangagpas. Alang kang Ligas nga 50-50 ang chance ni Magsayo apan iyang gihulagway nga malisod nga tahas ang sagubangon sa kanhi ALA fighter.
Gitumbok ni Ligas nga ang kasinatian ni Russell maoy maghatag og kalisdanan sa 23-anyos nga Magsayo, kinsa adunay 23-0, 16 ka knockouts. Si Russell naghupot og 31-1, 18KOs nga baraha.